អង្គការអឌ្ឍចន្ទក្រហមប៉ាឡេស្ទីន (PRCS) កាលថ្ងៃអង្គារ (ទី២ ខែមករា) បានចេញផ្សាយវីដេអូនៃមនុស្សម្នា ដែលបានជម្លៀសចេញពីអគាររបស់ខ្លួន នៅក្នុងទីក្រុង Khan Younis បន្ទាប់ពីអាគារនោះរងការវាយប្រហារតាមអាកាស។

ក្នុងរូបភាពវីដេអូនោះ គេឃើញមនុស្សម្នារត់ចុះពីលើជណ្តើរ ដែលមានកម្ទេចកម្ទី នៅលើដី។ គេឃើញក្រុមគ្រូពេទ្យដឹកអ្នករបួសម្នាក់ចេញពីអគារចូលទៅក្នុងរថយន្តសង្គ្រោះបន្ទាន់។

វីដេអូនេះត្រូវបានគេបង្ហោះដោយមានចំណងជើងថា «ឈុតឆាកនៃភាពភ័យរន្ធត់ និងភ័យស្លន់ស្លោ ក្នុងចំណោមជនភៀសខ្លួននៅក្នុងដែនដី បន្ទាប់ពីមានការទម្លាក់គ្រាប់បែកលើអគារ PRCS នៅទីក្រុងKhanYunis ជាលើកទី២ ដែលបាននាំឲ្យមានការស្លាប់ជនភៀសខ្លួនចំនួន ៥នាក់ ក្នុងនោះរួមទាំងទារកទើបនឹងកើត ដែលមានអាយុមិនដល់មួយសប្តាហ៍ផង និងរងរបួស ៣នាក់ ក្នុងនោះរួមទាំងអ្នកស្ម័គ្រចិត្តឆ្លើយតបដំបូងផងដែរ»។

ទីតាំងរបស់ឃ្លីបវីដេអូនេះត្រូវបានផ្ទៀងផ្ទាត់ថា ជាទីក្រុង Khan Younis ដោយអគារ ផ្លូវ និងដើមឈើដែលត្រូវនឹងរូបភាពផ្កាយរណបនៃតំបន់នោះ។ ដំបូល និងទ្វារខាងក្នុងអគារក៏ត្រូវគ្នានឹងរូបភាពឯកសារពីមុន ដែលបង្ហោះដោយអឌ្ឍចន្ទក្រហមពីទីតាំងនេះ។ សារព័ត៌មាន Reuters មិនអាចបញ្ជាក់កាលបរិច្ឆេទដែលវីដេអូនេះ ត្រូវបានថតនោះទេ៕