ប្រព័ន្ធផ្សព្វផ្សាយរដ្ឋបានរាយការណ៍ថា ការ​បំផ្ទុះគ្រាប់បែក​ចំនួន២ បាន​សម្លាប់​មនុស្ស​យ៉ាង​ហោច​ណាស់ ៩៥នាក់ក្នុងប្រទេសអ៊ីរ៉ង់កាលពីថ្ងៃពុធ ដោយបាន​បំផ្ទុះនៅ​ក្នុង​ ហ្វូងមនុស្ស​ដែលកំពុង​ប្រារព្ធ​​ពិធី​រំលឹកដល់វិញ្ញាណក្ខន្ធលោកឧត្តមសេនីយ៍ កាសេម សូឡេម៉ានី (Qasem Soleimani) បួន​ឆ្នាំ​បន្ទាប់ពីការស្លាប់របស់លោកនៅក្នុងការវាយប្រហាររបស់សហរដ្ឋអាមេរិក។

ទីភ្នាក់ងារសារព័ត៌មានផ្លូវការ IRNAនិយាយថា ចំនួនអ្នកស្លាប់បានកើនឡើងដល់ ៩៥ នាក់ ខណៈ​ទូរទស្សន៍រដ្ឋរាយការណ៍ថាមនុស្ស ២១១ នាក់បានរងរបួស ហើយ​មួយ​ចំនួន​មាន​ស្ថាន​ភាព​ធ្ងន់ធ្ងរ។ មេដឹកនាំកំពូលរបស់អ៊ីរ៉ង់ លោក អាយ៉ាតូឡា អាលី ខាមីណេ (Ayatollah Ali Khamenei) បានស្តីបន្ទោស សត្រូវអាក្រក់ និងឧក្រិដ្ឋជន របស់ប្រទេសនេះ ចំពោះការ​វាយ​ប្រហារ​នេះ ​ហើយបានប្តេជ្ញា ឆ្លើយតបយ៉ាងធ្ងន់ធ្ងរ។

ការផ្ទុះ​ពីរលើកដែលបានហៅថាជា ការវាយប្រហារភេរវកម្ម ដោយប្រព័ន្ធផ្សព្វផ្សាយរដ្ឋ និង​ក្រុម​អាជ្ញាធរ​ក្នុងតំបន់ បានកើតឡើងស្របពេលមានភាពតានតឹងខ្លាំងនៅមជ្ឈិមបូព៌ា ជុំវិញ​សង្គ្រាម​អ៊ីស្រាអែល និងក្រុមហាម៉ាសនៅតំបន់ហ្កាហ្សា និងការ​សម្លាប់​មេដឹក​នាំ​ជាន់​ខ្ពស់​របស់​ក្រុម​ហាម៉ាស​នៅ​លីបង់កាលពីថ្ងៃអង្គារ។

ការវាយប្រហារ គ្មានការអះអាង ដែលបង្កឱ្យមានការភ័យខ្លាចនៃជម្លោះកាន់តែធំនៅក្នុងតំបន់ បានធ្វើឱ្យទីផ្សារសកល រង្គោះរង្គើរ ដែលធ្វើតម្លៃប្រេងបានកើនឡើងជាងបីភាគរយ។

ការ​​បំផ្ទុះ​នៅចន្លោះពីគ្នាប្រហែល១៥ នាទីបានវាយប្រហារនៅជិតទីបញ្ចុះសព នៅវិហារអ៊ីស្លាម សាហេប​អាល់ ហ្សាម៉ាន់ (Saheb al-Zaman) ក្នុងទីក្រុងឃើមែន(Kerman) ដែលជា​ស្រុក​កំណើតភា​គខាងត្បូងរបស់លោក សូឡេម៉ានី ស្របពេលក្រុម​អ្នកគាំ​ទ្រ​បាន​ប្រមូល​ផ្តុំ​គ្នា​ដើម្បី​រំឮក​ដល់​ការ​ស្លាប់​របស់​លោក​នៅ​ក្នុង​ការ​វាយ​ប្រហារ​ដោយ​យាន​ដ្រូន​របស់​សហរដ្ឋ​អាមេរិក​កាល​ពី​ឆ្នាំ​២០២០ នៅទីក្រុងបាកដាដ ប្រទេសអ៊ីរ៉ាក់ ។

សារព័ត៌មាន IRNA បាននិយាយថា ការផ្ទុះដំបូងបានកើតឡើងប្រហែល ៧០០ ម៉ែត្រពីផ្នូររបស់ លោក សូឡេម៉ានី ចំណែកការផ្ទុះមួយទៀតនៅចម្ងាយប្រហែលមួយគីឡូម៉ែត្រ។

លោក​ប្រធានាធិបតី Ebrahim Raisi បានថ្កោលទោសឧក្រិដ្ឋកម្មដ៏ព្រៃផ្សៃ ខណៈ​សាធារណ​រដ្ឋ​អ៊ីស្លាមអ៊ីរ៉ង់ បានប្រកាសថ្ងៃព្រហស្បតិ៍សប្ដាហ៍នេះ ជាថ្ងៃកាន់ទុក្ខទូទាំងប្រទេស៕