អគ្គលេខាធិការអង្គការសហប្រជាជាតិ លោក Antonio Guterres បាន​ថ្កោល​ទោស​យ៉ាង​ខ្លាំង​កាល​ពីថ្ងៃពុធ ចំពោះការបំផ្ទុះគ្រាប់បែកនៅក្នុងពិធីមួយក្នុងប្រទេសអ៊ីរ៉ង់ ដើម្បី​គោរព​ដល់​អតីត​មេ​បញ្ជាការ​ជាន់ខ្ពស់អ៊ីរ៉ង់ លោក Qassem Soleimani ។

ការផ្ទុះ​ចំនួនពីរលើកបានសម្លាប់មនុស្សជិត ១០០នាក់ និង​ជា​ច្រើន​នាក់​ទៀត​បាន​រងរបួស​នៅ​ក្នុង​ពិធីកាលពីថ្ងៃពុធដើម្បីរំលឹកដល់មេបញ្ជាការជាន់ខ្ពស់ លោក Qassem Soleimani ដែល​ត្រូវ​បាន​សម្លាប់​ដោយ​យាន​ដ្រូនរបស់សហរដ្ឋអាមេរិកកាលពីឆ្នាំ ២០២០ ដោយបានដាក់កំហុសលើ ក្រុម​ភេរវករ​ដែលមិនបានបញ្ជាក់។

លោកស្រី Florencia Soto Nino អ្នកនាំពាក្យរងរបស់អគ្គលេខាធិការបាននិយាយថា លោក​អគ្គ​លេខា​ធិការ​បានថ្កោលទោសយ៉ាងដាច់អហង្ការ ចំពោះការ​វាយ​ប្រហារ​នេះ​ទៅ​លើ​ពិធី​រំលឹក​វិញ្ញាណ​ក្ខន្ធ នៅទីក្រុង Kerman ក្នុងសាធារណរដ្ឋអ៊ីស្លាមអ៊ីរ៉ង់។ លោកស្រី Soto Nino បាន​និយាយ​បន្ថែម​ថា លោកអគ្គលេខាធិការ បានអំពាវនាវ​ឱ្យអ្នកទាំងនោះ​ត្រូវ​ចេញ​មក​ទទួល​ខុស​ត្រូវ​។

ទូរទស្សន៍រដ្ឋអ៊ីរ៉ង់ បានរាយការណ៍ពីការបំផ្ទុះលើកទីមួយ និងបន្ទាប់មកមានការផ្ទុះលើកទីពីរ ក្នុង​អំឡុង​ពេលព្រឹត្តិការណ៍ខួបដែលមានមនុស្សច្រើន នៅទីបញ្ចុះសពរបស់លោក Soleimani ត្រូវ​បាន​បញ្ចុះ​នៅក្នុងទីក្រុង Kerman ភាគអាគ្នេយ៍។

ទូរទស្សន៍​រដ្ឋ​បាននិយាយថា មនុស្សជិត១០០នាក់បានស្លាប់ និង២១១នាក់​ផ្សេង​ទៀត​បាន​រង​របួស ដែលធ្វើឱ្យវាក្លាយជាការវាយប្រហារដ៏ឃោឃៅបំផុតមួយនៅក្នុងប្រទេសអ៊ីរ៉ង់ ដែល​បាន​ប្រឈម​មុខ​នឹងឧប្បត្តិហេតុស្រដៀងគ្នា កាលពីពេលកន្លងមក ពីក្រុមផ្សេងៗ រួមទាំងក្រុម​រដ្ឋ​អ៊ីស្លាម​ផង​ដែរ៕