សមាជិកក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធ (០៣ មករា) បានអំពាវនាវឱ្យក្រុមឧទ្ទាមហ៊ូទី (Houthis) របស់យេម៉ែន បញ្ឈប់ការវាយប្រហាររបស់ពួកគេលើការដឹកជញ្ជូននៅសមុទ្រក្រហម និងឈូងសមុទ្រ អាដែន (Aden) ដោយនិយាយថាការវាយប្រហារទាំងនោះជារឿងខុសច្បាប់ និងគំរាមកំហែងដល់ស្ថិរភាពក្នុងតំបន់ សេរីភាពនៃការធ្វើនាវាចរណ៍ និងការផ្គត់ផ្គង់ស្បៀងអាហារពិភពលោក។
ថ្លែងទៅកាន់កិច្ចប្រជុំផ្លូវការលើកដំបូងរបស់ក្រុមប្រឹក្សានៃឆ្នាំ២០២៤ បណ្ដាសមាជិកក៏បានទាមទារឱ្យក្រុមហ៊ូទី ដោះលែងនាវា ហ្កាឡាក់ស៊ី ឡីតឌ័រ (Galaxy Leader) ដែលជានាវាដឹកទំនិញដំណើរការដោយប្រទេសជប៉ុន ដែលមានទំនាក់ទំនងជាមួយក្រុមហ៊ុនអ៊ីស្រាអែល និងក្រុមនាវិកដែលក្រុមឧទ្ទាមនេះចាប់បានកាលពីថ្ងៃទី១៩ ខែវិច្ឆិកា។
សមាជិកមួយចំនួនបានជំរុញឱ្យក្រុមប្រឹក្សាចាត់វិធានការដើម្បីបញ្ឈប់ការវាយប្រហារដោយមីស៊ីល និងយានដ្រូនរបស់ក្រុមហ៊ូទី ប៉ុន្តែស្ថាប័ននេះមិនបានចាត់វិធានការជាផ្លូវការនៅក្នុងកិច្ចប្រជុំបើកទ្វារនោះទេ មុននឹងចូលទៅក្នុងការពិគ្រោះយោបល់ក្នុងកិច្ចប្រជុំបិទទ្វារ។
ក្រុមហ៊ូទី ដែលមានសម្ព័ន្ធមិត្តអ៊ីរ៉ង់ និងគ្រប់គ្រងតំបន់ភាគច្រើននៃប្រទេសយេម៉ែន បានបាញ់បង្ហោះយានដ្រូន និងមីស៊ីលទៅលើនាវាជាង ២០គ្រឿងចាប់តាំងពីថ្ងៃទី១៩ ខែវិច្ឆិកា ដោយនិយាយថា ក្នុងសាមគ្គីភាពជាមួយប៉ាឡេស្ទីននៅតំបន់ហ្កាហ្សា ហើយពួកគេកំពុងកំណត់គោលដៅលើនាវាដែលមានទំនាក់ទំនងរបស់អ៊ីស្រាអែល ឬកំពុងធ្វើដំណើរទៅកាន់អ៊ីស្រាអែល។
ប៉ុន្តែនាវាជាច្រើនមិនមានទំនាក់ទំនងជាមួយអ៊ីស្រាអ៊ែល និងមិនត្រូវបានកំណត់សម្រាប់ចូលចតក្នុងកំពង់ផែអ៊ីស្រាអែលឡើយ ហើយខ្សែដឹកជញ្ជូនសំខាន់ៗជាច្រើនបានផ្អាកប្រតិបត្តិការរបស់ពួកគេឆ្លងកាត់សមុទ្រក្រហមដោយសារភ័យខ្លាចការវាយប្រហារនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
