គិតត្រឹមបំណាច់ឆ្នាំ ២០២៣ នេះ កម្ពុជាមានប្រភពថាមពលសរុបចំនួន ២៦ គម្រោង ដែល​មាន​កម្លាំង​ផលិតសរុប ៣ ៤៥១ មេហ្គាវ៉ាត់សម្រាប់ផ្គត់ផ្គង់ដល់លំនៅឋានពលរដ្ឋជាង ៨៨ ភាគរយ ខណៈ​កម្ពុជាកំពុងជំរុញការផ្គត់ផ្គង់អគ្គិសនីដល់គ្រប់ភូមិ ១០០ ភាគរយនៅឆ្នាំត្រឹមឆ្នាំ ២០៣០។

បើតាមការបង្ហាញរបស់ក្រសួងរ៉ែ និងថាមពល អំពីសមិទ្ធផលធំៗនៃការអភិវឌ្ឍវិស័យថាមពល រ៉ែ និង​ប្រេងកាត របស់ព្រះ រាជាណាចក្រកម្ពុជា ក្នុងនោះចំពោះវិស័យអគ្គិសនី គិតត្រឹមបំណាច់ឆ្នាំ ២០២៣ នេះ កម្ពុជាមានប្រភពថាមពលសរុប ពីវារីអគ្គិសនី ថាមពលដើដោយធ្យូងថ្ម ថាមពល​កកើត​ឡើង​វិញជាដើម មានចំនួន ២៦ គម្រោង ដោយមានកំលាំងផលិតសរុប ៣ ៤៥១ មេហ្គាវ៉ាត់ ក្នុងនោះកម្ពុជានឹងប្រើប្រាស់ថាមពលកកើតឡើងវិញឱ្យបានយ៉ាងហោច ៧០ ភាគរយ នៅ​ត្រឹមឆ្នាំ ២០៣០ មកពីប្រភពថាមពល ព្រះអាទិត្យ ខ្យល់ វារីអគ្គិសនី និងជីវម៉ាស ដើម្បី​រួម​ចំណែក​កាត់​បន្ថយផលប៉ះពាល់ដល់បរិស្ថាន ការឡើងកម្តៅផែនដី និងជំរុញ កំណើន​សេដ្ឋកិច្ច​ប្រកប​ដោយ​ចីរភាព។

ទាក់ទិន​ការតបណ្តាញអគ្គិសនីវិញ, ក្រសួងរ៉ែ និងថាមពល បានអភិវឌ្ឍន៍ខ្សែបញ្ជូនបណ្តាញជាតិ ត​ភ្ជាប់​ទៅកាន់ភូមិបាន ចំនួនជាង ៩៨ ភាគរយ និងបាន​ផ្គត់​ផ្គង់​ទៅ​ដល់​លំនៅ​ឋាន​ប្រជាពលរដ្ឋ​ជាង ៨៨ ភាគរយរួចហើយ ក្នុងនោះជាផែនការក្រសួងរ៉ែ និង ថាមពល នឹង​ជំរុញ​ការ​ផ្គត់ផ្គង់​ទៅ​ដល់​ភូមិ​ទាំងអស់នៅកម្ពុជាឲ្យបាន ១០០ ភាគរយ នៅត្រឹមឆ្នាំ ២០៣០ ផងដែរ។

សូមបញ្ជាក់ថា ជុំវិញគម្រោងការប្រើប្រាស់ថាមពលកកើតឡើងវិញនេះ, ក្រសួងរ៉ែ និងថាមពល មាន​មហិច្ឆតា គឺធ្វើឲ្យប្រទេសកម្ពុជា ក្លាយជាគោលដៅសំខាន់ សម្រាប់ការវិនិយោគបៃតង ដើម្បី​ជួយ​កំណើន​សេដ្ឋកិច្ច និងការធានាថា កំណើនប្រែក្លាយទៅជាការបង្កើត ការងារ និង​ការ​លើក​កម្ពស់​សហគមន៍ តាមរយៈកញ្ចប់នៃនិរន្តរភាព។ ម្យ៉ាងវិញទៀត ការថ្លឹងថ្លែង​ពី​អត្ថ​ប្រយោជន៍​នៃ​ការ​រីក​ចម្រើន ថាមពល ដោយមិនធ្វើឱ្យប៉ះពាល់ដល់បរិស្ថាន ឬសង្គមសម្រាប់ មនុស្ស​ជំនាន់​បច្ចុប្បន្ន និងអនាគត ដោយការផ្លាស់ប្តូរទៅជាថាមពល ស្អាត ព្រមទាំងមានប្រសិទ្ធភាពជាងនេះ នឹង​មិន​ត្រឹមតែមានប្រយោជន៍សម្រាប់សេដ្ឋកិច្ចរបស់យើងប៉ុណ្ណោះទេ វាគឺជាការវិនិយោគ យុទ្ធសាស្ត្រ និងការអនុវត្តក្នុងរយៈពេលវែង៕ អត្ថបទ៖ សុន រ៉ាឌី