ហ្វីលីពីន៖ លោកប្រធានាធិបតី Rodrigo Duterte បានគំរាមចាប់ដាក់ពន្ធនាគារ ចំពោះអ្នកទាំងឡាយដែលមិនព្រមចាក់វ៉ាក់សាំងប្រឆាំងវីរុសកូរ៉ូណា ខណៈប្រទេសនេះប្រឹងប្រែងប្រយុទ្ធប្រឆាំងនឹងការឆ្លងរាលដាលដ៏ធ្ងន់ធ្ងរបំផុតមួយ ក្នុងចំណោមប្រទេសជាច្រើននៅអាស៊ី ស្របពេលដែលប្រទេសហ្វីលីពីនមានករណីឆ្លងជាង ១លាន ៣សែននាក់ និងស្លាប់ជាង ២៣.០០០នាក់។
លោក Duterte បានថ្លែងនៅតាមកញ្ចក់ទូរទស្សន៍កាលពីថ្ងៃចន្ទ ក្រោយមានសេចក្ដីរាយការណ៍ថា មានចំនួនពលរដ្ឋទៅទទួលវ៉ាក់សាំងទាប នៅមណ្ឌលចាក់វ៉ាក់សាំងមួយចំនួនក្នុងរដ្ឋធានីម៉ានីល។ លោក Duterte បាននិយាយថា សូមកុំយល់ច្រឡំនឹងរូបលោកពេលនេះប្រទេសកំពុងមានវិបត្តិ លោកធ្វើដើម្បីពលរដ្ឋហ្វីលីពីនមិនមែនតម្រូវចិត្តរដ្ឋាភិបាលទេ។ គិតត្រឹមថ្ងៃទី២០ ខែមិថុនា ក្រុមអាជ្ញាធរហ្វីលីពីនបានចាក់វ៉ាក់សាំងគ្រប់ចំនួនដូសដល់ពលរដ្ឋត្រឹមជាង ២លាន ១សែននាក់ ជាដំណើរការយឺតយ៉ាវឆ្ពោះទៅការសម្រេចតាមផែនការរបស់រដ្ឋាភិបាល ក្នុងការចាក់វ៉ាក់សាំងជូនពលរដ្ឋរបស់ខ្លួនឲ្យបាន ៧០លាននាក់ នៅក្នុងប្រទេសដែលមានប្រជាជនសរុបជាង ១១០លាននាក់នៅឆ្នាំនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
