សហភាពមីយ៉ាន់ម៉ា បានប្រារព្ធខួបលើកទី ៧៦ ទិវាឯករាជ្យដោយមានព្រឹត្តិការណ៍ជាច្រើន ត្រូវបានធ្វើឡើងនៅទូទាំងប្រទេស ដែលបង្ហាញដោយក្បួនព្យុហយាត្រាក្រុមភ្លេងយោធា នៅក្នុងរដ្ឋធានី ណៃពិ-ដ (Nay Pyi Taw) នៅថ្ងៃព្រហស្បតិ៍នេះ។

នៅក្នុងសារថ្ងៃទិវាបុណ្យឯករាជ្យ ឧត្តមសេនីយជាន់ខ្ពស់ លោក មីន អ៊ុងលាំង(Min Aung Hlaing) ប្រធានក្រុមប្រឹក្សារដ្ឋបាលរដ្ឋ បានបញ្ជាក់ថា គោលបំណងចម្បងរបស់ក្រុមប្រឹក្សារដ្ឋបាលរដ្ឋ គឺត្រូវរៀបចំការបោះឆ្នោតសកលតាមបែបលទ្ធិប្រជាធិបតេយ្យពហុបក្ស សេរី និងយុត្តិធម៌ ជាមួយនឹងការត្រៀមរៀបចំជាបន្តបន្ទាប់សម្រាប់ដំណើរការបោះឆ្នោត។

ក្នុងអំឡុងពេលនៃការប្រារព្ធពិធីនៅព្រឹកថ្ងៃព្រហស្បតិ៍នេះ កងកិត្តិយស របស់កងកម្លាំងប្រដាប់អាវុធ បានដង្ហែក្បួនព្យុហយាត្រា បង្ហាញពីការប្តេជ្ញាចិត្តរបស់ប្រទេសជាតិ ចំពោះគោលការណ៍អធិបតេយ្យភាពរបស់ខ្លួន។

ពិធីបុណ្យឯករាជ្យនេះ មានសកម្មភាពជាច្រើន រួមមានទាំងការប្រកួតកីឡាទូទាំងប្រទេស។ បន្ថែមលើនេះ អ្នកទោសជាង ៩.៦៥០នាក់ រួមមានទាំងជនបរទេស១១៤នាក់ ត្រូវបានលើកលែងទោសនៅថ្ងៃព្រហស្បតិ៍នេះ ដើម្បីប្រារព្ធទិវាបុណ្យឯករាជ្យជាតិលើកទី ៧៦ នៃប្រទេសអាស៊ីអាគ្នេយ៍មួយនេះ។ សហភាពមីយ៉ាន់ម៉ា ទទួលបានឯករាជ្យ និងអធិបតេយ្យភាព ពីអាណានិគមនិយមអង់គ្លេស នៅថ្ងៃទី ៤ ខែមករា ឆ្នាំ ១៩៤៨។