អតីតប្រធានាធិបតីអាមេរិកលោក Donald Trump បានស្នើឲ្យតុលាការកំពូលអាមេរិកលុបចោលសេចក្តីសម្រេច ដែលនឹងរារាំងរូបលោកមិនឲ្យមានឈ្មោះក្នុងស្លឹកឆ្នោតប្រជែងតំណែងប្រធានាធិបតី នៅរដ្ឋ Colorado ដោយបង្កើតនូវការតវ៉ាជាប្រវត្តិសាស្ត្រ ជុំវិញថា តើតួនាទីរបស់លោកក្នុងការលុកលុយ នៅថ្ងៃទី៦ ខែមករា ឆ្នាំ២០២១ លើវិមាន Capitol ធ្វើឲ្យរូបលោកបាត់បង់សិទ្ធិពីមុខតំណែងដែរ ឬទេ។

នៅក្នុងបណ្តឹងឧទ្ធរណ៍មួយ ដែលបានដាក់នៅថ្ងៃទី៣ ខែមករា លោក Trump បានជំរុញឲ្យតុលាការជាន់ខ្ពស់ប្រកាសថា លោកមិនបានមានចំណែករួម ក្នុងការបះបោរ ដោយព្យាយាមលុបចោលការបរាជ័យ ក្នុងការបោះឆ្នោតឆ្នាំ២០២ របស់លោក ជាកត្តាជំរុញ ដែលនាំឲ្យឈានដល់មានការលុកលុយលើវិមាន Capitol របស់សហរដ្ឋអាមេរិក។

តុលាការកំពូលរដ្ឋខូឡូរ៉ាដូ បានប្រកាសថា លោក Trump មិនមានសិទ្ធិទាមទារសេតវិមានវិញទេ ដោយសារតែការខិតខំប្រឹងប្រែងរបស់លោក ដើម្បីកែប្រែជ័យជម្នះរបស់លោក Joe Biden។ ការសម្រេចនេះ គឺជាការលើកដំបូងមិនធ្លាប់មាន ក្នុងការលើកឡើងនូវឃ្លាបះបោររបស់រដ្ឋធម្មនុញ្ញប្រឆាំងនឹងអតីតប្រធានាធិបតី។

បើយោងតាមច្បាប់ចម្លងនៃឯកសារដែលសារព័ត៌មាន Bloomberg បានឃើញ បង្ហាញថា លោក Trump បានប្រាប់តុលាការកំពូលថា បញ្ហាគឺ «មានសារៈសំខាន់បំផុត»។ លោកបានជំទាស់ថា «សេចក្តីសម្រេចរបស់តុលាការកំពូលរដ្ឋ Colorado នឹងដកសិទ្ធិអ្នកបោះឆ្នោតរាប់លាននាក់ នៅរដ្ឋ Colorado ដោយផ្ទុយពីរដ្ឋធម្មនុញ្ញ ហើយទំនងជាត្រូវបានប្រើប្រាស់ជាគំរូ ដើម្បីដកសិទ្ធិអ្នកបោះឆ្នោតរាប់សិបលាននាក់ទៀត នៅទូទាំងប្រទេស»៕