នៅឯសន្និសីទសារព័ត៌មាន នាទីក្រុងប៉េកាំង នៅថ្ងៃព្រហស្បតិ៍ (ទី៤ ខែមករា)នេះ អ្នកនាំពាក្យក្រសួងការបរទេសចិន លោក Wang Wenbin បាននិយាយថា ប្រទេសចិនសូមចូលរួមរំលែកទុក្ខក្រៀមក្រំបំផុត ចំពោះជនរងគ្រោះ ក្នុងការវាយប្រហារភេរវកម្ម នៅខេត្ត Kerman របស់អ៊ីរ៉ង់ ហើយបានថ្កោលទោសយ៉ាងខ្លាំង ចំពោះការវាយប្រហារនេះ។

លោក Wang បានប្រាប់ថា៖ «ប្រទេសចិនមានការតក់ស្លុតជាពន់ពេក ចំពោះការវាយប្រហារភេរវកម្មដ៏ធំ នៅក្នុងខេត្ត Kerman ភាគអាគ្នេយ៍ប្រទេសអ៊ីរ៉ង់ ដែលបណ្តាលឲ្យមានអ្នកបាត់បង់ជីវិត និងរបួសយ៉ាងច្រើន។ យើងសូមចូលរួមរំលែកទុក្ខយ៉ាងក្រៀមក្រមបំផុត ចំពោះជនរងគ្រោះ និងសូមសម្ដែងនូវការអាណិតអាសូរយ៉ាងស្មោះស្ម័គ្រ ចំពោះអ្នករបួស និងក្រុមគ្រួសារអ្នកស្លាប់។ ប្រទេសចិនប្រឆាំងនឹងអំពើភេរវកម្មគ្រប់រូមភាពទាំងអស់ សូមថ្កោលទោសយ៉ាងខ្លាំងក្លា ចំពោះការវាយប្រហារភេរវកម្ម និងគាំទ្រយ៉ាងម៉ឺងម៉ាត់ ចំពោះកិច្ចខិតខំប្រឹងប្រែងរបស់អ៊ីរ៉ង់ ដើម្បីការពារសន្តិសុខ និងស្ថិរភាពរបស់ជាតិ»។

ទីភ្នាក់ងារសារព័ត៌មានផ្លូវការ IRNA និងទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍ថា ការផ្ទុះចំនួន២ បានកើតឡើងនៅជិតកន្លែងបញ្ចុះសពរបស់ឧត្តមសេនីយ៍អ៊ីរ៉ង់ លោក Qassem Soleimani ដែលបានសម្លាប់មនុស្សយ៉ាងហោចណាស់ ១០៣នាក់ និងរបួសជាង ១៧០នាក់ កាលពីថ្ងៃពុធ (ទី៣ ខែមករា)។ 

ការបំផ្ទុះបានកើតឡើងនៅពេលដែលមនុស្សជាច្រើនបានប្រមូលផ្តុំគ្នា នៅទីបញ្ចុះសព ក្នុងទីក្រុង Kerman ដើម្បីប្រារព្ធខួបលើកទី៤ នៃការស្លាប់របស់លោក Soleimani នៅក្នុងការវាយប្រហារដោយយានដ្រូនរបស់សហរដ្ឋអាមេរិក៕