សេវាកម្មជួយសង្គ្រោះ នៅថ្ងៃព្រហស្បតិ៍ (ទី៤ ខែមករា) នេះ បានជម្លៀសអ្នកបើកបរចេញពីរថយន្តរាប់រយគ្រឿង ដែលជាប់គាំងពេញមួយយប់ នៅលើផ្លូវរបស់ប្រទេសស៊ុយអែត និងដាណឺម៉ាក ខណៈដែលព្រិលធ្លាក់ខ្លាំង ខ្យល់បក់ខ្លាំង និងស្ថានភាពត្រជាក់ បាននាំឲ្យមានការកកស្ទះចរាចរណ៍ធំ។

នៅប្រទេសស៊ុយអែត យោធាបានចល័តរថយន្តតាមដាន ដើម្បីជួយជម្លៀស និងនាំយកអាហារ និងទឹកដឲ្យអ្នក ដែលជាប់គាំងនៅលើផ្លូវមួយ នៅភាគខាងត្បូងប្រទេស។ ទីភ្នាក់ងារដឹកជញ្ជូនស៊ុយអែត បាននិយាយថា ខ្លួនរំពឹងថា ផ្លូវ E22 ដែលរងផលប៉ះពាល់ រវាងទីក្រុង Horby និងទីក្រុង Kristianstad នឹងបើកដំណើរការឡើងវិញ នៅថ្ងៃសុក្រស្អែកនេះ បន្ទាប់ពីផ្លូវនេះបានស្ទះដោយយានយន្ត កាលពីថ្ងៃពុធ (ទី៣ ខែមករា) ខណៈដែលរថយន្តដឹកទំនិញ បានជាប់គាំង ហើយរនាស់ត្រាក់ទ័រព្យាយាមជួយសម្អាតផ្លូវ។

ដោយដកស្រង់សម្ដីសេវាសង្គ្រោះ ទីភ្នាក់ងារសារព័ត៌មាន TT បានរាយការណ៍ថា រថយន្តជាច្រើន ត្រូវបានទុកចោល ខណៈពេលដែលការជម្លៀសបានបន្តធ្វើ នៅពេលដែលអ្នកផ្សេងទៀតអាចវិលត្រឡប់មកវិញ នដោយសារក្រុមអ្នកជួយសង្គ្រោះ បានកាត់រន្ធនៅក្នុងរនាំងដែក ដែលបែងចែកផ្លូវចរាចរណ៍ឆ្ពោះទៅខាងត្បូង និងឆ្ពោះទៅខាងជើង៕