ភ្នំពេញ៖ ផ្លូវជាតិលេខ៣ តភ្ជាប់ភ្នំពេញ-កំពត សាងសង់សម្រេចបាន ៩៨ភាគរយហើយ ប៉ុន្តែមួយឆ្នាំក្រោយទៀត ទើបក្រសួងសាធារណការសម្រេចថា នឹងចុះហត្ថាលេខាទទួលយក ឬមិនទទួលយក ព្រោះនៅតាមដានពិនិត្យគុណភាពសិន។
ការដ្ឋានសាងសង់ផ្លូវជាតិលេខ៣ ពីចោមចៅ រាជធានីភ្នំពេញទៅដល់ក្រុងកំពត បើគិតមកដល់ពេលនេះការសាងសង់សម្រេចបានប្រមាណ៩៣%ហើយ។ នេះបើតាមការបញ្ជាក់របស់ ឯកឧត្ដម ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងប្រាប់អ្នកសារព័ត៌មាន នាឱកាសអញ្ជើញត្រួតពិនិត្យដំណើរការនៃការសាងសង់ផ្លូវជាតិលេខ៣ នាថ្ងៃទី២២ ខែមិថុនា ឆ្នាំ២០២១។
ឯកឧត្ដមទេសរដ្ឋមន្ដ្រី ស៊ុន ចាន់ថុល មានប្រសាសន៍ថា ផ្លូវជាតិលេខ៣នេះ បានសាងសង់លឿនមុនផែនការមួយឆ្នាំ ដែលគម្រោងផែនការ គឺនឹងបញ្ចប់នៅឆ្នាំ២០២២ឯណោះ។
ផ្លូវជាតិលេខ៣ មានប្រវែងសរុបប្រមាណ ១៣៤គីឡូម៉ែត្រ ដោយក្នុងនោះ ប្រវែង ៦៩គីឡូម៉ែត្រ ចាប់ពីចោមចៅដល់បែកគុស មានទទឹង២៤,៥ម៉ែត្រ ត្រូវសាងសង់ជាផ្លូវ៤គន្លង ដោយ២គន្លងទៅ និង២គន្លងមក មានសួនច្បារកណ្តាល និងចាប់ពីបែកគូស ដល់ទីរួមខេត្តកំពតប្រវែងជាង ៦៥ គីឡូម៉ែត្រ ត្រូវសាងសង់ជាផ្លូវ ២គន្លង គឺ១គន្លងទៅ និង១គន្លងមក ទទឹងផ្លូវ១២ម៉ែត្រ និងក្រាលបេតុងកៅស៊ូ AC កម្រាស់ ៧០ មីលីម៉ែត្រ។ ជាផែនការត្រូវប្រើពេលសាងសង់រយៈពេល៤៨ខែ ប្រើប្រាស់ថវិកាជាង២២០លានដុល្លារសហរដ្ឋអាមេរិក ដែលបានបើកការដ្ឋានស្ថាបនាសាងសង់ នៅថ្ងៃទី០៧ ខែឧសភា ឆ្នាំ២០១៨កន្លងទៅ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
បន្ថែមលើកការសាងសង់ផ្លូវជាតិលេខ៣នេះ ក្រសួងសាធារណការ និងដឹកជញ្ជូនបានបំពាក់កាមេរ៉ាចាំវាស់ល្បឿនលើសកំណត់ និងរៀបចំបង្កប់ជញ្ជីងថ្មឹងរថយន្តនៅតាមបណ្តោយផ្លូវជាតិលេខ៣ ដើម្បីត្រួតពិនិត្យទម្ងន់ ហើយធ្វើការផ្ទៀងផ្ទាត់ជាមួយការថ្លឹងរបស់ស្ថានីយ៍ជញ្ជីងអចល័ត ដែលនឹងសាងសង់នៅសងខាងផ្លូវតែម្ដង៕ អត្ថបទ៖ ប្រាក់ វ៉ាន់ដា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
