កងទ័ពជើងទឹកអាមេរិកបាននិយាយថា ទូកដ្រូនរបស់ក្រុមឧទ្ទាមហ៊ូទី (Houthi) ដែលផ្ទុកទៅដោយគ្រឿងផ្ទុះ បានបំផ្ទុះនៅសមុទ្រក្រហមកាលពីថ្ងៃព្រហស្បតិ៍ (០៤ មករា) ប៉ុន្តែមិនបណ្តាលឱ្យមានការខូចខាត ឬរបួសនោះទេ ខណៈក្រុមដែលមានមូលដ្ឋាននៅយេម៉ែននេះបានបន្តការវាយប្រហាររបស់ខ្លួន ប្រឆាំងនឹងការអំពាវនាវអន្តរជាតិឱ្យបញ្ឈប់វាយប្រហារ។

ការវាយប្រហារចុងក្រោយបំផុតនេះបានកើតឡើងរយៈពេលមួយថ្ងៃបន្ទាប់ពីប្រទេសចំនួន១២ រួមទាំងសហរដ្ឋអាមេរិក អង់គ្លេស និងជប៉ុនបានចេញសេចក្តីថ្លែងការណ៍រួមមួយដោយព្រមានក្រុមហ៊ូទី ពី «ផលវិបាក» ដែលមិនបានបញ្ជាក់ បើមិនបញ្ឈប់ការវាយប្រហាររបស់ខ្លួន នៅក្នុងអ្វីដែលមន្ត្រីអាមេរិកម្នាក់កាលពីថ្ងៃពុធ បាននិយាយថាគឺជាការព្រមានចុងក្រោយ។

ក្រុមហ៊ូទី ដែលជាសម្ព័ន្ធមិត្តអ៊ីរ៉ង់ និងគ្រប់គ្រងភាគច្រើននៃប្រទេសយេម៉ែន បានបើករលកនៃការបំផ្ទុះយានដ្រូន និងមីស៊ីលជាបន្តបន្ទាប់លើនាវាពាណិជ្ជកម្ម ចាប់តាំងពីថ្ងៃទី១៩ ខែវិច្ឆិកា ដោយព្យាយាមបង្កការបំផ្លិចបំផ្លាញ ក្នុងអ្វីដែលពួកគេនិយាយថាជាការតវ៉ាប្រឆាំងនឹងប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា។

យុទ្ធនាការក្រុមហ៊ូទីនេះបានរំខានយ៉ាងខ្លាំងដល់ការដឹកជញ្ជូនអន្តរជាតិ ដែលបណ្តាលឱ្យក្រុមហ៊ុនមួយចំនួនផ្អាកការដឹកជញ្ជូនឆ្លងកាត់សមុទ្រក្រហម ហើយជំនួសមកវិញនូវការធ្វើដំណើរដ៏យូរ និងចំណាយច្រើនជាងមុននៅជុំវិញទ្វីបអាហ្វ្រិក៕