ក្នុងគោលបំណងធ្វើឱ្យប្រសើរឡើងនូវការគ្រប់គ្រង និងការផ្តល់សេវាអប់រំយុវជន និងកីឡា ប្រកប​ដោយ​ប្រសិទ្ធភាព គុណភាព គណនេយ្យភាព តម្លាភាព បរិយាប័ណ្ន និងសមធម៌សង្គម រាជរដ្ឋាភិបាល​កម្ពុជា បានចេញអនុក្រឹត្យ សម្រេចធ្វើការផ្ទេរការទទួលខុសត្រូវក្នុងការគ្រប់គ្រង និង​ការផ្តល់សេវាអប់រំ ពីថ្នាក់ជាតិទៅឱ្យរដ្ឋបាលក្រុង ស្រុក ខណ្ឌទូទាំងប្រទេសវិញ។

ស្របតាមអនុក្រឹត្យ និងការសម្រេចរបស់រាជរដ្ឋាភិបាល និងតាមការណែនាំរបស់ក្រសួងអប់រំ យុវជននិងកីឡា នាថ្ងៃទី៤ ខែមករា ឆ្នាំ២០២៤ នៅមន្ទីរអប់រំ យុវជននិងកីឡាខេត្តពោធិ៍សាត់ មាន​រៀបចំពិធី ផ្ទេរមុខងារគ្រប់គ្រងក្នុវិស័យអប់រំ យុវជន និងកីឡា ទៅអោយរដ្ឋបាលក្រុង-ស្រុក សម្រា​ប់​ឆ្នាំ២០២៤ ក្រោមអធិបតីភាព ឯកឧត្តម ងួន ប៉ោសេង អភិបាលរងខេត្ត តំណាង ឯកឧត្តម ខូយ រីដា អភិបាលខេត្តពោធិ៍សាត់ និងដោយមានការចូលរួមពីរដ្ឋបាលក្រុង-ស្រុក​ទាំ​ង​៧ក្នុ​ង​ខេត្តពោធិ៍សាត់ផងដែរ ។

សម្រាប់មុខងារចំនួន៣ ក្នុងវិស័យអប់រំ ត្រូវធ្វើការផ្ទេរទៅអោយរដ្ឋបាលក្រុង-ស្រុករួមមាន៖ ១.មុខងារ​គ្រប់គ្រងការអប់រំកុមារតូច, ២.មុខងារគ្រប់គ្រងការអប់រំបឋមសិក្សា និង ៣.មុខងារ​គ្រប់គ្រង​ការ​អប់រំក្រៅប្រព័ន្ធ។

ក្នុងនោះ ក៏មានការធ្វើប្រតិភូកម្មមុខងារគាំទ្រផ្នែករដ្ឋបាលក្នុងវិស័យអប់រំ យុវជន និងកីឡា ចំនួន៣ ទៅ​ឱ្យរដ្ឋបាលក្រុង ស្រុក ផងដែរ រួមមាន ៖ ១.មុខងារគាំទ្រផ្នែករដ្ឋបាលដល់គ្រឹះស្ថានមធ្យមសិក្សាចំណេះទូទៅ, ២.មុខងារគាំទ្រផ្នែករដ្ឋបាលដល់ការងារអភិវឌ្ឍយុវជន និង ៣.មុខងារគាំទ្រផ្នែករដ្ឋបាលដល់ការងារអប់រំកាយ និងកីឡា។

នាឱកាសនោះ ឯកឧត្តម ងួន ប៉ោសេង បានលើកឡើងថា ការផ្ទេរមុខងារក្នុងវិស័យអប់រំ យុវជន និង​កីឡា ទៅឱ្យរដ្ឋបាលក្រុង ស្រុក តាមរយៈអនុក្រឹត្យនេះ គឺជាការបែងចែក​ឡើងវិញ​ឱ្យ​បាន​ច្បាស់​លាស់​នូវតួនាទី និងការទទួលខុសត្រូវរវាង ក្រសួងអប់រំ យុវជន និងកីឡា និងរដ្ឋបាលក្រុង ស្រុក ខណ្ឌ ក្នុងគោលបំណងធ្វើឱ្យប្រសើរឡើងនូវគុណភាព និងប្រសិទ្ធភាព នៃ​ការ​ផ្តល់​សេវា​អប់រំ ដែលត្រូវបានផ្ទេរទៅឱ្យរដ្ឋបាលក្រុង ស្រុក ខណ្ឌ ស្របជាមួយនឹងគោលបំណង នៃ​កំណែ​ទម្រង់​ក្នុង​វិស័យអប់រំ ដែលបាន និងកំពុងអនុវត្តដោយ ក្រសួងអប់រំ យុវជន និងកីឡាផងដែរ។ តែ​ទោះបីយ៉ាងណា ក្រសួង អប់រំ យុវជន និង កីឡា នៅតែមានតួនាទី សំខាន់នៅ ក្នុងការ រៀបចំ គោល​នយោបាយជាតិ ផែនការ យុទ្ធសាស្ត្រ ជាតិ ការសិក្សាស្រាវជ្រាវកម្មវិធីសិក្សាជាតិ និយាម និង​ស្តង់ដា​អប្បបរមា ការជ្រើសរើស និងការបណ្តុះបណ្តាលគ្រូ កាគាំទ្របច្ចេកទេស ការ​តាម​ដាន​ត្រួតពិនិត្យ និងវាយតម្លៃដដែល៕ អត្ថបទ៖ ភិរុណ ពៅ