នាយករដ្ឋមន្ត្រីជប៉ុន លោក Kishida Fumio បានអំពាវនាវឱ្យមានស្ថានភាពជីវិតរស់នៅល្អប្រសើរ សម្រាប់ប្រជាជនដែលស្នាក់នៅក្នុងទីជម្រក បន្ទាប់ពីរញ្ជួយដីដ៏មានឥទ្ធិពលកាលពីថ្ងៃចន្ទ។ លោក Kishida បានបញ្ជាឱ្យរៀបចំការសាងសង់លំនៅឋានបណ្តោះអាសន្នផងដែរ។

នៅថ្ងៃសុក្រនេះ រដ្ឋាភិបាល បានបើកកិច្ចប្រជុំលើកទីបួនរបស់ខ្លួននៃក្រុមការងារគ្រោះមហន្តរាយបន្ទាន់សម្រាប់ការរញ្ជួយដីនៅឧបទ្វីប Noto នៅលើឆ្នេរសមុទ្រប្រទេសជប៉ុន។ លោក Kishida និយាយថាប្រតិបត្តិការជួយសង្គ្រោះ កំពុងទទួលបានលទ្ធផល ប៉ុន្តែបានបញ្ជាក់លើតម្រូវការដើម្បីបន្តកិច្ចខិតខំប្រឹងប្រែងនេះ។ លោកនិយាយថា លក្ខខណ្ឌអនាម័យនៅក្នុងទីជម្រក នឹងត្រូវបានធ្វើឲ្យប្រសើរឡើង។

លោកនាយករដ្ឋមន្ត្រី បានស្នើរឲ្យមានវិធានការជួយប្រជាជនថែរក្សាសុខភាព និងបង្ការជំងឺ ដែលអាចបណ្តាលឲ្យស្លាប់ ដោយសារតែគ្រោះមហន្តរាយនេះ។

លោក Kishida បានណែនាំមន្ត្រីឱ្យពន្លឿនការជួសជុលផ្លូវ ដើម្បីឱ្យការផ្គត់ផ្គង់ជំនួយសង្គ្រោះ និងបុគ្គលិក អាចទៅដល់តំបន់ដាច់ស្រយាល។ លោក បានប្រាប់ក្រុមមន្ត្រី ឱ្យចាប់ផ្តើមការរៀបចំការសាងសង់លំនៅឋានបណ្តោះអាសន្ន។

លោក Kishida និយាយថា រដ្ឋាភិបាលនឹងជួយជ្រុំជ្រែងដល់ជីវិតរស់នៅរបស់ប្រជាជន ដែលរងផលប៉ះពាល់ដោយរញ្ជួយដី ហើយបានស្នើឱ្យមន្ត្រីគៀងគរកញ្ចប់ជំនួយគាំទ្រ ឱ្យបានឆាប់តាមដែលអាចធ្វើទៅបាន។