មន្ទីរបញ្ចកោណបាននិយាយថា យោធាសហរដ្ឋអាមេរិកបានបើកការវាយប្រហារសងសឹកនៅទីក្រុងបាកដាដ កាលពីថ្ងៃព្រហស្បតិ៍ (០៤ មករា) ដោយបានសម្លាប់មេដឹកនាំកងជីវពលម្នាក់ ដែលខ្លួនបានស្តីបន្ទោសថានៅពីក្រោយការវាយប្រហារនាពេលថ្មីៗនេះលើបុគ្គលិកសហរដ្ឋអាមេរិក ដោយជាទង្វើមួយដែលត្រូវបានថ្កោលទោសយ៉ាងខ្លាំងដោយរដ្ឋាភិបាលអ៊ីរ៉ាក់។

មន្ទីរបញ្ចកោណបាននិយាយថា ការវាយប្រហាររបស់សហរដ្ឋអាមេរិកបានកើតឡើងនៅម៉ោងប្រហែល ០៩:០០ (ម៉ោងក្នុងស្រុក) ហើយបានកំណត់គោលដៅទៅលើលោក ម៉ាសថាក ចាវ៉ាដ កាហ្ស៊ីម អាល់ចាវ៉ារី (Mushtaq Jawad Kazim al Jawari) ដោយបន្ថែមថាបុរសរូបនេះគឺជាមេដឹកនាំនៃក្រុមកងជីវពល ហារ៉ាកាត អាល់នូចាបា (Harakat al Nujaba) ដែលបានចូលរួមក្នុងការរៀបចំផែនការ និងធ្វើការវាយប្រហារប្រឆាំងនឹងបុគ្គលិកអាមេរិក។

ចាប់តាំងពីសង្រ្គាមអ៊ីស្រាអែល និងហាម៉ាស បានចាប់ផ្តើមនៅក្នុងខែតុលាមក យោធាអាមេរិកបានទទួលរងការវាយប្រហារយ៉ាងហោចណាស់ ១០០ដងនៅក្នុងប្រទេសអ៊ីរ៉ាក់ និងស៊ីរី ដែលជាធម្មតាជាការវាយប្រហារជាមួយនឹងគ្រាប់រ៉ូកែត និងយានដ្រូនវាយប្រហារ។ សហរដ្ឋអាមេរិកមានកងទ័ពចំនួន ២.៥០០នាក់នៅក្នុងប្រទេសអ៊ីរ៉ាក់ និងកងទ័ព ៩០០នាក់ នៅក្នុងប្រទេសស៊ីរី ដែលជាអ្នកជិតខាង ហើយបានផ្តោតលើការទប់ស្កាត់ការកើតឡើងវិញនៃពួកសកម្មប្រយុទ្ធរដ្ឋអ៊ីស្លាម។

នៅក្នុងសេចក្តីថ្លែងការណ៍មួយ អ្នកនាំពាក្យយោធារបស់នាយករដ្ឋមន្ត្រីអ៊ីរ៉ាក់ ម៉ូហាម៉េដ ស៊ីអា អាល់សុដានី (Mohammed Shia al-Sudani) បានរិះគន់ការវាយប្រហារលើក្រុមនេះ ដោយហៅវាថាជា «ការវាយប្រហារដោយអយុត្តិធម៌លើអង្គភាពសន្តិសុខអ៊ីរ៉ាក់» ដែលកំពុងប្រតិបត្តិការជាមួយនឹងការអនុញ្ញាតពីនាយករដ្ឋមន្ត្រីអ៊ីរ៉ាក់រូបនេះ៕