មេដឹកនាំក្រុមជីវពលហាម៉ាស់លោក Khaled Meshaal បាននិយាយកាលពីថ្ងៃព្រហស្បតិ៍ថា អ៊ីស្រាអែលចង់នាំវិបត្តិសង្រ្គាមទៅកាន់ប្រទេស និងពង្រីកការឈ្លានពានរបស់ពួកគេ ។

សេចក្តីអធិប្បាយរបស់លោកនៅក្នុងសេចក្តីថ្លែងការណ៍លើកញ្ចក់ទូរទស្សន៍ បានធ្វើឡើងកាលពីរយៈពេល ២ថ្ងៃមុន ក្រោយមេដឹកនាំរងលោក Saleh al-Arouri ត្រូវបានសម្លាប់នៅក្នុងការវាយប្រហារដោយយានដ្រូននៅតំបន់ជាយក្រុងភាគខាងត្បូងទីក្រុង Beirut ដែលជាតំបន់កាន់កាប់ដោយក្រុមឧទ្ទាមហេសប៊ូឡា និងជាសម្ព័ន្ធមិត្តរបស់ពួកគេ នៅប្រទេសលីបង់ ពេលដែលលោកបានជួបជាមួយក្រុមជនប៉ាឡេស្ទីន និងក្រុមជីវពលលីបង់ជាសម្ព័ន្ធមិត្តរបស់ក្រុមហាម៉ាស់ ។

អ៊ីស្រាអែល មិនបានបញ្ជាក់ ឬច្រានចោលការជាប់ពាក់ព័ន្ធណាមួយឡើយ ។

លោក Meshaal ខ្លួនលោកផ្ទាល់ បានរស់រានពីការប៉ុនប៉ងធ្វើឃាតកាលពីឆ្នាំ ១៩៩៧ផងដែរ ដោយក្រុមភ្នាក់ងារ Mossad របស់អ៊ីស្រាអែល នៅប្រទេសហ្សកដានី ។

លោក Meshaal និយាយបន្តទៀតថា ពួកគេគិតថា ការធ្វើឃាតក្រុមមេដឹកនាំ នឹងបំបែកឆន្ទៈតស៊ូ ហើយនិងធ្វើឲ្យថ្នាក់ដឹកនាំទន់ខ្សោយ ដោយពួកគេពុំបានដឹងថាវាគឺជាការបំភាន់ដ៏ធំនោះទេ ។

ការស្លាប់របស់លោក Arouri គឺជាការធ្វើឃាតបានសម្រេចជាលើកដំបូងលើមន្រ្តីក្រុមហាម៉ាស់នៅក្រៅទឹកដីប៉ាឡេស្ទីន ចាប់តាំងពីការវាយឆ្មក់សម្លាប់មនុស្សរបស់ក្រុមជីវពលហាម៉ាស់នៅតំបន់ភាគខាងត្បូងប្រទេសអ៊ីស្រាអែល កាលពីថ្ងៃទី ៧ ខែតុលាកន្លងទៅ ដែលនាំឲ្យមានការសម្លាប់រង្គាលរបស់អ៊ីស្រាអែលនៅតំបន់ហ្គាហ្សា ៕