រដ្ឋមន្ត្រីការពារជាតិអ៊ីស្រាអែល លោក Yoav Gallant កាលពីថ្ងៃព្រហស្បតិ៍ (ទី៤ ខែមករា) បានបង្ហាញផែនការរបស់លោក សម្រាប់ការគ្រប់គ្រងតំបន់ហ្កាហ្សាស្ទ្រីប ក្រោយសង្គ្រាម ដោយនិយាយថា ទាំងក្រុមហាម៉ាស និងអ៊ីស្រាអែល នឹងមិនគ្រប់គ្រងទឹកដីហ៊ុមព័ទ្ធប៉ាឡេស្ទីននោះឡើយ បន្ទាប់ពីអរិភាព នៅទីនោះបានបញ្ចប់។

លោក Gallant បានបង្ហាញគ្រោងនៃផែនការរបស់លោក សម្រាប់ថ្ងៃបន្ទាប់ពីសង្គ្រាមទៅកាន់អ្នកសារព័ត៌មាន មុនពេលបញ្ជូនផែនការនោះទៅគណៈរដ្ឋមន្ត្រីសង្គ្រាមរបស់នាយករដ្ឋមន្ត្រី លោក Benjamin Netanyahu ដែលបានខ្វែងគំនិតគ្នា ក្នុងប៉ុន្មានសប្តាហ៍ថ្មីៗនេះ អំពីអនាគតនៃតំបន់ហ្កហ្សា បន្ទាប់ពីការបណ្ដេញក្រុមហាម៉ាស ដែលបានគ្រប់គ្រងតំបន់នេះ តាំងពីឆ្នាំ២០០៧ មក។

ក្រោមផែនការនេះ សង្គ្រាមរបស់អ៊ីស្រាអែល នៅក្នុងដែនដីនេះ នឹងបន្តរហូតដល់ធានាបាននូវការវិលមកវិញនៃចំណាប់ថ្នូរ ដែលត្រូវបានចាប់ខ្លួន កាលពីថ្ងៃទី៧ ខែតុលា លុបបំបាត់ «សមត្ថភាពយោធា និងការគ្រប់គ្រង» របស់ក្រុមហាម៉ាស និងបំផ្លាញរាល់ការគំរាមកំហែងផ្នែកយោធាដែលនៅសល់។

បន្ទាប់ពីនោះ គ្រោងការនេះបានបង្ហាញថា ដំណាក់កាលថ្មីមួយ នឹងចាប់ផ្តើមក្នុងអំឡុងពេលដែល «ក្រុមហាម៉ាស នឹងមិនគ្រប់គ្រងតំបន់ហ្កាហ្សា ហើយនឹងមិនបង្កការគំរាមកំហែងសន្តិសុខដល់ពលរដ្ឋអ៊ីស្រាអែល» ដោយសង្គមប៉ាឡេស្ទីនក្នុងតំបន់ សន្មតថា ជាអភិបាលកិច្ចនៃដែនដីនេះ។ ផែនការនេះបញ្ជាក់ថា អ៊ីស្រាអែល នឹងរក្សាសិទ្ធិក្នុងការប្រតិបត្តិការនៅក្នុងដែនដីនេះ ប៉ុន្តែនឹងមិនមានវត្តមានជនស៊ីវិលអ៊ីស្រាអែលនៅក្នុងតំបន់ហ្កាហ្សាស្ទ្រីបនេះទេ បន្ទាប់ពីសង្រ្គាមនេះ សម្រេចបានគោលដៅ៕