ស៊ីហ្គេម៖ គណៈកម្មាធិការជាតិរៀបចំការប្រកួត កីឡាអាស៊ីអាគ្នេយ៍លើកទី៣២ ឆ្នាំ២០២៣ ហៅកាត់ CAMSOC នៅថ្ងៃទី២២ ខែមិថុនានេះបានបន្ដបើកកិច្ចប្រជុំប្រចាំសប្ដាហ៍ លក្ខណៈចង្អៀតតាមអនឡាញដែលដឹកនាំដោយឯកឧត្ដម ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC ដើម្បីត្រួតពិនិត្យអំពីការរៀបចំកម្មវិធីសម្ដែង ត្រៀមទទួលទង់ស៊ីហ្គេមពីវៀតណាម ទោះបីការប្រកួតកីឡាស៊ីហ្គេមឆ្នាំ២០២១ នៅរដ្ឋធានីហាណូយមានភាពស្រពេចស្រពិលនៅឡើយក៏ដោយ។
ឯកឧត្ដម វ៉ាត់ ចំរើន អគ្គលេខាធិការ CAMSOC បានគូសបញ្ជាក់ថា ការទទួលទង់ស៊ីហ្គេម គឺជាផ្នែកមួយដ៏សំខាន់ នៃដំណើរឆ្ពោះទៅព្រឹត្តិការណ៍ប្រវត្តិសាស្ត្រនៅកម្ពុជា។ អាស្រ័យហេតុនេះ គណៈកម្មការជំនាញបានផ្ដល់ការយកចិត្តទុកដាក់ខ្ពស់ លើការរៀបចំនូវកម្មវិធីសម្ដែងដើម្បីបង្ហាញនូវទស្សនីយភាពដ៏អស្ចារ្យ ក្នុងកម្មវិធីទទួលទង់ស៊ីហ្គេមពីវៀតណាម គ្រាដែលកម្ពុជានឹងរៀបចំទស្សនីយភាព ៣បញ្ចូលគ្នាដើម្បីបង្ហាញនូវការស្វាគមន៍ និងទាក់ទាញការចូលរួមស៊ីហ្គេមឆ្នាំ២០២៣ នៅកម្ពុជា រួមមានទស្សនីយភាពវប្បធម៌ ទេសចរណ៍ និងភាពរីកចម្រើននៃវិស័យកីឡាជាដើម។ រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC ដដែលបន្ដថា ទោះបីស៊ីហ្គេមឆ្នាំ២០២១ នៅវៀតណាមកំពុងស្ថិតក្នុងភាពស្រពេចស្រពិលយ៉ាងណាក្ដី ប៉ុន្តែកម្ពុជាមិនរង់ចាំនោះឡើយ ពោលគឺកម្ពុជាអនុវត្តទៅតាមប្រតិទិនការងារ និងផែនការយុទ្ធសាស្ត្រដ៏ច្បាស់លាស់របស់ខ្លួន ដើម្បីសម្រួចទិសដៅឆ្ពោះទៅស៊ីហ្គេមឆ្នាំ២០២៣។
គួរបញ្ជាក់ថា ចំពោះកាលបរិច្ឆេទស៊ីហ្គេមឆ្នាំ២០២១ នៅវៀតណាមអាចនឹងត្រូវកំណត់ចុងក្រោយនាថ្ងៃទី២៤ ខែមិថុនាខាងមុខ បន្ទាប់ពីគណៈកម្មាធិការជាតិអូឡាំពិកវៀតណាម បានលើកសំណើរចំនួន ៣ ទៅរដ្ឋាភិបាលរបស់ខ្លួន ទី១-អាចរក្សាការប្រកួតនៅដដែលចាប់ពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ និងទី២-អាចពន្យារពេលទៅពាក់កណ្ដាលឆ្នាំ២០២២ និងទី៣-អាចលើកពេលទៅឆ្នាំ២០២៥ ឬឆ្នាំ២០២៧។ ប៉ុន្តែឯកឧត្ដម វ៉ាត់ ចំរើន បានអះអាងថា ប្រសិនបើវៀតណាមអាចរៀបចំស៊ីហ្គេមមុនឆ្នាំ២០២៣ កម្ពុជានឹងត្រូវគោរពនីតិវិធីស៊ីហ្គេមនៃការទទួលទង់ពីវៀតណាម តែប្រសិនបើវៀតណាមអាចលើកពេលដល់ឆ្នាំ២០២៥ ឬឆ្នាំ២០២៧ វិញ តាមគោលការណ៍ម្ចាស់ផ្ទះស៊ីហ្គេមចុងក្រោយ ដែលត្រូវប្រគល់ទង់ស៊ីហ្គេមមកកម្ពុជាគឺប្រទេសហ្វីលីពីន។ តែយ៉ាងណាឯកឧត្ដមរំពឹងថា វៀតណាមនឹងមិនមានការផ្លាស់ប្ដូរច្រើន ឬអាចផ្លោះទៅវៀតណាមនៅឆ្នាំ២០២៥ ឬឆ្នាំ២០២៧ នោះទេ។ ដូច្នេះកម្ពុជានៅតែមានលទ្ធភាពខ្ពស់ក្នុងការទទួលទង់ស៊ីហ្គេមពីវៀតណាម ដើម្បីត្រៀមបន្ដវេនធ្វើម្ចាស់ផ្ទះព្រឹត្តិការណ៍ស៊ីហ្គេមនាឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
