នាង Maria Leba និងសាច់ញាតិរបស់នាង បានរស់នៅក្នុងតង់មួយនៅក្នុងសួនច្បារ រយៈពេលជាច្រើនថ្ងៃមកហើយ បន្ទាប់ពីសកម្មភាពភ្នំភ្លើង Lewotobi Laki-Laki កើនឡើង នៅភាគអាគ្នេយ៍កោះ Flores ប្រទេសឥណ្ឌូនេស៊ី។

ការផ្ទុះឡើងជាច្រើនលើកនៃភ្នំភ្លើង Lewotobi Laki-Laki នៅកោះ Flores ខាងកើត ក្នុងខេត្ត East Nusa Tenggara ក្នុងរយៈពេលមួយខែកន្លងទៅនេះ បានបង្ខំឱ្យមានការជម្លៀសមនុស្សជាង ២.០០០ នាក់ពីក្នុងភូមិសរុបចំនួន ៧ភូមិ។ ទីតាំងសាធារណៈជាច្រើន រួមមានសាលារៀន និងអាកាសយានដ្ឋាន ក៏ត្រូវបានបង្ខំឱ្យបិទនៅតំបន់ដែលរងផលប៉ះពាល់។

កម្រិតគ្រោះថ្នាក់សម្រាប់ភ្នំភ្លើងដែលមានកម្ពស់ ១.៥៨៤ម៉ែត្រ ខាងលើនីវ៉ូទឹកសមុទ្រ បានកើនឡើងពីកម្រិត II ដល់កម្រិត III ក្រោមកម្រិតខ្ពស់បំផុតចំនួន៤ របស់ប្រទេសចាប់តាំងពីថ្ងៃចន្ទ។

យោងតាមមជ្ឈមណ្ឌលសម្រាលគ្រោះថ្នាក់ភូមិសាស្ត្រ និងភ្នំភ្លើង របស់ប្រទេសបានឲ្យដឹងថា ការផ្ទុះភ្នំភ្លើងកាលពីថ្ងៃចន្ទ បានបញ្ចេញផេះភ្នំភ្លើងឡើងដល់កម្ពស់ ១.៥០០ម៉ែត្រពីលើកំពូលភ្នំ ដោយមនុស្សជាច្រើន ត្រូវបានណែនាំឱ្យជៀសវាងតំបន់ហាមឃាត់នៅជុំវិញមាត់ភ្នំភ្លើងដ៏ធំ ចម្ងាយ៣ គីឡូម៉ែត្រ។