ការសិក្សាមួយ ដែលបានចេញផ្សាយ កាលពីថ្ងៃព្រហស្បតិ៍ (ទី៤ ខែមករា) បានបង្ហាញថា ការបំភាយឧស្ម័នរបស់អាល្លឺម៉ង់ ស្ថិតនៅកម្រិតទាបបំផុត ក្នុងរយៈពេលប្រហែល ៧០ឆ្នាំ ខណៈដែលប្រទេសសេដ្ឋកិច្ចធំជាងគេបំផុតរបស់តំបន់អឺរ៉ុបនេះ បានគ្រប់គ្រងកាត់បន្ថយការពឹងផ្អែកលើធ្យូងថ្មលឿនជាងការរំពឹងទុក។

បើយោងតាមវិទ្យាស្ថានស្រាវជ្រាវថាមពល Agora Energiewende បានឲ្យដឹងថា ប្រទេសសេដ្ឋកិច្ចធំជាងគេបំផុតរបស់អឺរ៉ុបនេះ បានបញ្ចេញឧស្ម័នផ្ទះកញ្ចក់ចំនួន ៦៧៣លានតោន ក្នុងឆ្នាំ២០២៣ ដោយទាបជាង ៩,៨ភាគរយ ឬតិចជាងឆ្នាំ២០២២ ចំនួន ៧៣លានតោន។

តួលេខនេះគឺទាបជាងឆ្នាំ១៩៩០ ចំនួន ៤៦ភាគរយ ដែលខិតទៅជិតគោលដៅឆ្នាំ២០៣០ របស់សហភាពអឺរ៉ុប (EU) ក្នុងការកាត់បន្ថយការបំភាយឧស្ម័ន ៥៥ភាគរយ ដោយយោងទៅនឹងឆ្នាំដូចគ្នា។

វិទ្យាស្ថាន Agora បានឲ្យដឹងនៅក្នុងសេចក្តីថ្លែងការណ៍ថា ជាការពិត ការបំភាយឧស្ម័នរបស់ប្រទេសអាល្លឺម៉ង់ គឺស្ថិតនៅចំណុចទាបបំផុត «ចាប់តាំងពីទសវត្សរ៍ឆ្នាំ១៩៥០» ខណៈដែលព្រមានថា រដ្ឋាភិបាលមានការងារត្រូវធ្វើ ដើម្បីកាត់បន្ថយការបង្កកខ្វក់បន្ថែមទៀត។ វិទ្យាស្ថានស្រាវជ្រាវនេះ បានបន្ថែមថា ការធ្លាក់ចុះនេះ មានការរួមចំណែកយ៉ាងច្រើនពីការធ្លាក់ចុះយ៉ាងខ្លាំងក្នុងការផលិតថាមពលធ្យូងថ្ម។

អាល្លឺម៉ង់បានងាកទៅប្រើប្រាស់ឥន្ធនៈ ក្រោយការលុកលុយរបស់រុស្ស៊ីលើអ៊ុយក្រែន នៅពេលដែលក្រុងមូស្គូ បានកាត់ផ្តាច់ការផ្គត់ផ្គង់ឧស្ម័នដល់ក្រុមហ៊ុនធំបំផុតៗរបស់អឺរ៉ុប។ ប៉ុន្តែចាប់តាំងពីពេលនោះមក ទីក្រុងប៊ែរឡាំង បានដោះស្រាយកាត់បន្ថយការប្រើប្រាស់របស់ខ្លួនបានយ៉ាងគួរឲ្យកត់សម្គាល់៕