ប្រធានាធិបតីអ៊ីរ៉ង់ និងអគ្គមេបញ្ជាការនៃកងឆ្មាំបដិវត្តន៍អ៊ីស្លាម (IRGC) នៅថ្ងៃសុក្រ (ទី៥ ខែមករា) នេះ បានប្តេជ្ញាសងសឹក នៅឯកន្លែងប្រារព្ធពិធីបុណ្យសព សម្រាប់ជនរងគ្រោះពីការបំផ្ទុះគ្រាប់បែក កាលពី ២ថ្ងៃមុន ដែលជាស្នាដៃរបស់ក្រុមរដ្ឋឥស្លាម។

កាលពីថ្ងៃពុធ (ទី៣ ខែមការា) ក្នុងទីក្រុង Kerman មនុស្សជិត ១០០នាក់ ត្រូវបានសម្លាប់នៅឯពិធីរំលឹកខួបសម្រាប់មេបញ្ជាការជាន់ខ្ពស់ លោក Qassem Soleimani ដែលត្រូវបានធ្វើឃាតនៅប្រទេសអ៊ីរ៉ាក់ ក្នុងឆ្នាំ២០២០ ដោយយានដ្រូនរបស់សហរដ្ឋអាមេរិក។

ក្រុមរដ្ឋឥស្លាម កាលពីថ្ងៃព្រហស្បតិ៍ (ទី៤ ខែមករា) បាននិយាយថា សមាជិករបស់ខ្លួន ២នាក់ បានបំផ្ទុះគ្រាប់បែកជាប់នឹងខ្សែក្រវាត់ នៅក្នុងក្រុមមនុស្សដ៏ណែនណាន់តាន់តាប់ ដែលបានប្រមូលផ្តុំគ្នានៅទីបញ្ចុះសព ក្នុងទីក្រុងភាគអាគ្នេយ៍។ ដោយសំដៅទៅលើក្រុមរដ្ឋឥស្លាម ឧត្តមសេនីយ៍ឯកលោក Hossein Salami ដែលមេបញ្ជាការរបស់ IRGC បាននិយាយនៅឯពិធីបុណ្យសពថា៖ «យើងនឹងស្វែងរកអ្នកគ្រប់ទីកន្លែងទាំងអស់ ដែលអ្នកនៅ»។

នៅក្នុងសុន្ទរកថាតាមទូរទស្សន៍ លោកប្រធានាធិបតី Ebrahim Raisi បាននិយាយថា៖ «សត្រូវរបស់យើងអាចមើលឃើញអំណាចរបស់អ៊ីរ៉ង់ ហើយពិភពលោកទាំងមូលដឹងពីកម្លាំង និងសមត្ថភាពរបស់ក្រុមនេះ។ កងកម្លាំងរបស់យើងនឹងសម្រេចពីទីកន្លែង និងពេលវេលា ដើម្បីចាត់វិធានការ»។

ទូរទស្សន៍រដ្ឋបានបង្ហាញមនុស្សម្នាយ៉ាងច្រើនកុះករ នៅមជ្ឈមណ្ឌលសាសនា Imam Ali ក្នុងទីក្រុង Kerman ជាកន្លែង ដែលក្រុមគ្រួសារបានយំសោកលើមឈូស ដែលដាក់ជាជួរ និងរុំដោយទង់ជាតិអ៊ីរ៉ង់។ អ្នកកាន់ទុក្ខបានស្រែកថា «សងសឹក សងសឹក« «ស្លាប់ទៅអាមេរិក» និង «ស្លាប់ទៅអ៊ីស្រាអែល»។

ទីក្រុងតេអេរ៉ង់ តែងតែចោទប្រកាន់អ៊ីស្រាអែល និងសហរដ្ឋអាមេរិកថា គាំទ្រក្រុមសកម្មប្រយុទ្ធប្រឆាំងអ៊ីរ៉ង់ ដែលបានធ្វើការវាយប្រហារ នាពេលកន្លងមក៕