អាមេរិក ៖ រដ្ឋមន្ត្រីការបរទេសសហរដ្ឋអាមេរិក លោក Antony Blinken និងអ្នកការទូតជាន់ខ្ពស់របស់សហភាពអឺរ៉ុបលោក Josep Borrell បានចាប់ផ្តើមការជំរុញផ្នែកការទូតថ្មីកាលពីថ្ងៃសុក្រ ដើម្បីបញ្ឈប់ការរាលដាលសង្រ្គាមពីតំបន់ហ្កាហ្សា ចូលទៅក្នុងតំបន់ West Bank កាន់កាប់ដោយអ៊ីស្រាអែល ប្រទេសលីបង់ និងទឹកដីដឹកជញ្ជូននៅសមុទ្រក្រហម។

យោងតាមមន្ត្រីប៉ាឡេស្ទីនបានឲ្យដឹងថា ដំណើរទស្សនកិច្ច នៅមជ្ឈិមបូព៌ារបស់អ្នកការទូតជាន់ខ្ពស់ បានធ្វើឡើងរយៈពេលបីខែបន្ទាប់ពីក្រុមសកម្មប្រយុទ្ធហាម៉ាស មកពីតំបន់ហ្កាហ្សា បានវាយប្រហារប្រទេសអ៊ីស្រាអែល បង្កឱ្យមានការវាយលុកដែលបានបំផ្លាញតំបន់នេះ ដោយពលរដ្ឋ៩០ភាគរយភៀសខ្លួន និងបណ្តាលឲ្យមនុស្ស ២២.៦០០នាក់ស្លាប់ ។

អ៊ីស្រាអែល និយាយថា ខ្លួនបានសម្លាប់ក្រុមសកម្មប្រយុទ្ធ ៨.០០០នាក់ ចាប់តាំងពីការស្លាប់ប្រជាជន ១.២០០នាក់ នៅក្នុងការវាយប្រហាររបស់ក្រុមហាម៉ាស់ កាលពីថ្ងៃទី ៧ ខែតុលា ដោយបានប្រកាសពីយុទ្ធសាស្រ្តដាក់គោលដៅបន្ថែមទៀត ក្រោមសម្ពាធជាសកលដើម្បីការពារការស្លាប់និងរងរបួសរបស់ជនស៊ីវិល។ ប៉ុន្តែពលរដ្ឋតំបន់ហ្កាហ្សា បាននិយាយថា យន្តហោះ និងរថក្រោះ របស់អ៊ីស្រាអែល បានបង្កើនការវាយប្រហារពេញមួយយប់ទៅលើក្រុង Al-Maghazi, Al-Bureij និង Al-Nuseirat ដែលមានប្រជាជនរស់នៅច្រើន នៅកណ្តាលតំបន់ឆ្នេរហ្កាហ្សា។ 

លោក Abdel Razek Abu Sinjar បាននិយាយថា រដ្ឋាភិបាលអ៊ីស្រាអែល អះអាងលទ្ធិប្រជាធិបតេយ្យ និងមនុស្សជាតិ ប៉ុន្តែអមនុស្សធម៌ ខណៈលោកយំនៅលើសាកសពប្រពន្ធនិងកូន ដែលបានស្លាប់ក្នុងការវាយប្រហារលើលំនៅឋានរបស់លោកក្នុងទីក្រុង Rafah ជាប់ព្រំដែនជាមួយប្រទេសអេហ្ស៊ីប។