លីបង់ ៖ ប្រធានក្រុមហេសបូឡា ដែលគាំទ្រដោយប្រទេសអ៊ីរ៉ង់នៅប្រទេសលីបង់ បានព្រមានដល់អ៊ីស្រាអែលកាលពីថ្ងៃសុក្រថា ក្រុមនេះនឹងឆ្លើយតបយ៉ាងរហ័ស នៅលើសមរភូមិ ចំពោះការសម្លាប់មេដឹកនាំរងរបស់ក្រុមហាម៉ាស នៅក្នុងទីតាំងដ៏រឹងមាំនៅទីក្រុងបេរូតភាគខាងត្បូង ប្រទេសលីបង់។

លោក Hassan Nasrallah បាននិយាយនៅក្នុងសុន្ទរកថាតាមទូរទស្សន៍ថា ការឆ្លើយតបនឹងកើតឡើងដោយជៀសមិនរួច។ យើងមិនអាចនៅស្ងៀម ចំពោះការរំលោភលើបញ្ហាដ៏ធ្ងន់នេះបានទេ ព្រោះវាមានន័យថា ប្រទេសលីបង់ទាំងមូល នឹងត្រូវទទួលរង ។ លោកនិយាយនៅក្នុងសុន្ទរកថាលើកទីពីររបស់លោក ចាប់តាំងពីការសម្លាប់លោក Saleh al-Aruri ថា ការសម្រេចចិត្តនៅពេលនេះ គឺស្ថិតលើកម្លាំងនៅសមរភូមិ។

លោកនិយាយថា អ្នកប្រយុទ្ធមកពីគ្រប់តំបន់នៅព្រំដែន នឹងក្លាយជាកម្លាំងអ្នកឆ្លើយតបចំពោះការរំលោភបំពានដ៏គ្រោះថ្នាក់នៅក្នុងតំបន់ជាយក្រុង។ ការវាយប្រហារកាលពីថ្ងៃអង្គារ ដែលត្រូវបានគេសន្និដ្ឋានយ៉ាងទូលំទូលាយថា ត្រូវបានធ្វើឡើងដោយអ៊ីស្រាអែល បានសម្លាប់លោក Aruri នៅក្នុងទីតាំងដ៏រឹងមាំរបស់ក្រុមហេសបូឡា នៅភាគខាងត្បូងទីក្រុងបេរូត(Beirut)។

នៅក្នុងសុន្ទរកថាមួយកាលពីថ្ងៃពុធ លោក Nasrallah បានព្រមានអ៊ីស្រាអែលរួចហើយប្រឆាំងការធ្វើសង្រ្គាមនៅប្រទេសលីបង់ ដោយគំរាមថា ការឆ្លើយតបរបស់ក្រុមនេះនឹងគ្មានដែនកំណត់។

លោក Nasrallah បាននិយាយថា ចាប់តាំងពីជម្លោះបានចាប់ផ្តើម ក្រុមនេះ បានអនុវត្តប្រតិបត្តិការប្រហែល ៦៧០លើក ដោយកំណត់គោលដៅទីតាំងព្រំដែនប្រទេសអ៊ីស្រាអែលចំនួន ៤៨លើក និងទីតាំងខាងក្រោយចំនួន១១លើក ។