បាល់ទាត់៖ កីឡាករ ម៉ាត់ នូរុណ បានសម្ដែងការសប្បាយចិត្តជាខ្លាំង ក្រោយបានចូលរួមជាមួយក្រុមជម្រើសជាតិកម្ពុជា ដើម្បីចូលរួមការប្រកួតសេសសល់ក្នុងវគ្គជម្រុះពានរង្វាន់ FIFA World Cup 2022 ពូល C ជុំទី២ នៅប្រទេសបារ៉ែនកាលពីថ្មីៗ ពិសេសបានហ្វឹកហាត់ជាមួយលោក Keisuke Honda អ្នកចាត់ការទូទៅក្រុមគោព្រៃកម្ពុជា និងបទពិសោធន៍ទទួលបានពីការប្រកួតជាមួយក្រុមខ្លាំងៗក្នុងព្រឹត្តិការណ៍នេះ។
ខ្សែប្រយុទ្ធស្នូលរបស់ក្លិបបឹងកេតរូបនេះបានបញ្ជាក់ថា លោក Honda បានផ្ដល់ដំបូន្មានល្អៗ ពិសេសចែករំលែកបទពិសោធន៍ អ្វីដែលជាកីឡាករអាជីព? នូរុណ បន្ដថា ហ្វឹកហាត់ជាមួយអតីតកីឡាករជម្រើសជាតិជប៉ុនរូបនេះគឺងាយស្រួល ដ្បិតលោកព្យាយាមពន្យល់អស់ពីលទ្ធភាព ដើម្បីឲ្យកូនក្រុមយល់នូវអ្វីដែលលោកចង់បាន។ ចំពោះការប្រកួតនៅប្រទេសបារ៉ែន កាលពីថ្មីៗ ទោះបី ម៉ាត់ នូរុណ បានបង្ហាញខ្លួនរយៈពេលខ្លីក៏ពិតមែន ប៉ុន្តែខ្លួនសប្បាយចិត្ត ពិសេសការប្រកួតជាមួយម្ចាស់ផ្ទះបារ៉ែន និងអ៊ីរ៉ង់ដែលគេបានបង្ហាញខ្លួន ហើយបានផ្ដល់បទពិសោធន៍ជាច្រើន ក្នុងការប្រកួតជាមួយក្រុមខ្លាំងៗទាំងអស់នោះ ដើម្បីដឹងពីចំណុចខ្លាំង និងចំណុចខ្សោយរបស់ខ្លួន ហើយយកមកអភិវឌ្ឍន៍ខ្លួនបន្ថែមទៀត។
គួរបញ្ជាក់ថា ម៉ាត់ នូរុណ ត្រូវបានគ្រូបង្វឹកក្រុមជម្រើសជាតិកម្ពុជា លោក Ryu Hirose កោះហៅចូលជម្រើសជាតិលើកដំបូងក្នុងការប្រកួតជម្រុះ FIFA World Cup 2022 នៅប្រទេសបារ៉ែនកាលពីដើមខែមិថុនាកន្លងទៅ ដោយបញ្ចប់ក្នុងលទ្ធផល ៣ប្រកួត ចាញ់ម្ចាស់ផ្ទះបារ៉ែន ៨-០, ចាញ់អ៊ីរ៉ាក់ ៤-១ និងចាញ់ក្រុមខ្លាំងអ៊ីរ៉ង់ ១០-០ ដែលនាំឲ្យកម្ពុជាបញ្ចប់ការប្រកួតត្រឹមចំណាត់ថ្នាក់លេខ៥ ក្នុងពូល C។ ក្រោយបញ្ចប់បេសកកម្មនេះ ក្រុមគោព្រៃកម្ពុជាបានធ្វើដំណើរមកមាតុភូមិវិញកាលពីរាត្រីថ្ងៃទី១៣ ខែមិថុនាកន្លងទៅ ហើយបានធ្វើដំណើរទៅធ្វើចត្ដាឡីស័ករយៈពេល ១៤ថ្ងៃនៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំរីករាយនាខេត្តកំពង់ឆ្នាំង ដែលមកទល់ពេលនេះមានរយៈពេល ១០ថ្ងៃហើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
