ពោធិ៍សាត់ ៖ នៅក្នុងឱកាសអញ្ជើញជាអធិបតីភាព ក្នុងកិច្ចប្រជុំបូកសរុបលទ្ធផលកាងារយុវជនឆ្នាំ២០២៣ និងលើកទិសដៅអនុវត្តន៍បន្តឆ្នាំ២០២៤ របស់ក្រុមការងារយុវជនគណបក្សប្រជាជនកម្ពុជាក្រុងពោធិ៍សាត់ នាព្រឹកថ្ងៃទី៦ ខែមករា ឆ្នាំ២០២៤ ឯកឧត្តម ខូយ រីដា សមាជិកគណៈកម្មាធិការកណ្តាល ប្រធានគណៈកម្មាធិការគណបក្ស ប្រជាជនកម្ពុជាខេត្តពោធិ៍សាត់ និងជាប្រធានក្រុមការងារចុះមូលដ្ឋានក្រុងពោធិ៍សាត់ បានកោតសរសើរដល់ក្រុមការងារយុវជនគណបក្សប្រជាជនកម្ពុជាក្រុងពោធិ៍សាត់ ដែលកន្លងមកតែងតែចូលរួមគ្រប់សកម្មភាព ទាំងការងារជួយប្រជាពលរដ្ឋតាមមូលដ្ឋាន និងការងារសង្គមនានា ជាពិសេសពេលមានគ្រោះធម្មជាតិដូចជាគ្រោះទឹកជំនន់ជាដើម ។ឯកឧត្តម ខូយ រីដា

បានបន្តថា” យុវជន” ជាកម្លាំងចលករ ដ៏សំខាន់មិនអាចខ្វះបាន សម្រាប់ប្រទេសជាតិ ទាំងបច្ចុប្បន្ន និងទៅអនាគត ដូចនេះគ្រប់យុវជនទាំងអស់ ត្រូវខិតខំអភិវឌ្ឍន៍កសាងខ្លួន ក្រេបយកចំណេះជំនាញ ជាពិសេសគឺបច្ចេកវិទ្យាថ្មីៗ ក៏ដូចជារៀនយកបទពិសោធន៍ពីមនុស្សចាស់ ហើយអ្វីដែលយុវជនគ្រប់រូបត្រូវតែមានជាដាច់ខាតនោះគឺ ឥរិយាបថសង្គម និងការស្វែងយល់ពីគោលនយោបាយរាជរដ្ឋាភិបាល ដែលសំដៅលើការចេះស្វែងយល់នូវអ្វីដែលគួរធ្វើ និងអ្វីដែលពុំគួរធ្វើ នៅក្នុងសង្គមការងារ និងសង្គមជាតិដែលយើងកំពុងរស់នៅ ហើយត្រូវចេះភាសាទំនាក់ទំនងសង្គម យកមនុស្សធ្វើជារបង ចេះលើកជាគំនិត និងចេះទទួលយកគំនិតរបស់អ្នកដទៃដើម្បីដោះស្រាយកិច្ចការងារអ្វីមួយ ។

ឯកឧត្តម ខូយ រីដា បានបន្តថា យុវជនជាទំពាំងស្នងឬស្សីប្រទេសជាតិ តែបើយុវជនណា ដែលមានចំណេះជំនាញហើយ តែគ្មានឥរិយាបថសង្គម មានតែអំនួត និងមោទនភាពលើចំណេះខ្លួនឯង មិនស្តាប់គេស្តាប់ឯង ប្រកាន់ជំហរថាមានតែអញធ្វើបាន យុវជននោះនឹងពុំអាចក្លាយជាទំពាំងស្នងឬស្សីសម្រាប់សង្គមជាតិបាននោះទេ ។ 

បើតាមលោក ចាប នាង ប្រធានក្រុមការងារយុវជនគណបក្សប្រជាជនកម្ពុជាក្រុងពោធិ៍សាត់ បានអោយដឹងថា យុវជនដែលបានចូលរួមក្នុងពេលនេះមានចំនួន៦០០នាក់ ។ ហើយបច្ចុប្បន្ននេះ សកម្មជនក្រុមការងារយុវជនគណបក្សប្រជាជនកម្ពុជាក្រុងពោធិ៍សាត់ នៅតាមសង្កាត់ទាំង៧សរុបមានចំនួន១៤១នាក់ ក្នុងកនោះស្រី៤៦នាក់ ។  អត្ថបទ ៖ ភិរុណ ពៅ