ចំនួនមនុស្សស្លាប់ដោយសារការរញ្ជួយដីធ្ងន់ធ្ងរដែលបានអង្រួនតំបន់ភាគកណ្តាលប្រទេសជប៉ុននៅថ្ងៃចូលឆ្នាំសកល បច្ចុប្បន្នបានកើនឡើងដល់ជាង ១២០ហើយ ខណៈដែលមនុស្ស ២១០ផ្សេងទៀត កំពុងបាត់ខ្លួន ។

 គួរឲ្យដឹងថា ការរញ្ជួយដីកម្រិត ៧,៦រ៉ិចទ័រ បានអង្រួនតំបន់ភាគខាងលិចឧបទ្វីប Noto កាលពីរសៀលថ្ងៃទី ១ ខែមករា ឆ្នាំ ២០២៤កន្លងទៅ បណ្តាលឲ្យខូចខាតធ្ងន់ធ្ងរដល់ផ្ទះសម្បែងប្រជាពលរដ្ឋ បង្កឲ្យកើតមានរលកស៊ូណាមិ និងកាត់ផ្តាច់ផ្លូវទៅកាន់តំបន់សហគមន៍ដាច់ស្រយាល ខណៈដែលទំហំខូចខាតទាំងស្រុង នៅមិនទាន់ដឹងច្បាស់នៅឡើយ ។

 យោងតាមការអះអាងរបស់ទីភ្នាក់ងារឧតុនិយមជប៉ុន បានឲ្យដឹងថា ការរញ្ជួយដីនេះ គឺជាការរញ្ជួយដីលើកដំបូង ចាប់តាំងពីការរញ្ជួយដីនៅខេត្ត Kumamoto កាលពីឆ្នាំ ២០១៦ ដែលចំនួនមនុស្សស្លាប់លើសពី ១០០នាក់ ។

 ខណៈពេលនោះដែរ ការងាររបស់ក្រុមការងារជួយសង្រ្គោះ ត្រូវបានរំខានដោយសារតែអាកាសធាតុអាក្រក់ ផ្លូវខូច និងបិទដោយបំណាក់ដីប្រហែល ១ពាន់កន្លែង ។

 កងកម្លាំងស្វ័យការពារជប៉ុន បានបញ្ជូនទាហានសរុប ៥.៤០០នាក់ ដើម្បីជួយបេសកកម្មសង្រ្គោះ ស្របពេលដែលនាវា ៩គ្រឿង យន្តហោះ ៣០គ្រឿង សុនខហិតខ្លិនចំនួន ១២ក្បាល បានចូលរួមប្រតិបត្តិការជួយសង្រ្គោះផងដែរ ៕