ភ្នំពេញ៖ អយ្យការអមសាលាដំបូងរាជធានីភ្នំពេញនៅថ្ងៃទី៦ ខែមករា ឆ្នាំ២០២៤នេះ បានចេញសេចក្តីប្រកាសព័ត៌មានពីការចាប់ខ្លួនបុគ្គល “នីណាក់”ដោយបញ្ជាក់ពីមូលហេតុថាមានចេតនាបង្ខូចកេរ្តិ៍ឈ្មោះ និងបំផ្លាញកិត្តិយសបុគ្គលអ្នកដ៏ទៃបើទោះបីដឹងថាជារឿងមិនពិតក៏ដោយ។

តាមរយៈសេចក្តីជូនដំណឹងអ្នកនាំពាក្យនៃអយ្យការអមសាលាដំបូងរាជធានីភ្នំពេញ សូមបញ្ជាក់ជូនថា ឈ្មោះ នី ណាក់ និងបក្ខពួក បានប្រើប្រាស់បណ្តាញទំនាក់ទំនងសង្គមឈ្មោះ Iman-KH ដើម្បីបង្ហោះ និងចែកចាយនូវព័ត៌មានមិនពិតកាលពីថ្ងៃទី១២ ខែធ្នូ ឆ្នាំ២០២៣ ដែលមានខ្លឹមសារថា“កាត់ដីឱ្យលោក ហេង សួរ ប្រហែលជាទុកសង់រោងចក្រ ២,០០០ និងធ្វើការិយាល័យឱ្យមន្ត្រីក្រសួងការងារព្រោះឃើញគាត់ប្រាប់ថាធ្វើការរហូតគ្មានថ្ងៃសៅរ៍ ឬ អាទិត្យ ឡើយ”។

បើតាមសេចក្តីប្រកាសរបស់សាលាដំបូងដដែល បុគ្គលនីណាក់នេះ នៅតែមិនព្រមកែសម្រួលសំណេររបស់ខ្លួនឡើយហើយនៅតែបន្តធ្វើសកម្មភាពបង្ហោះ និងចែកចាយដដែលបើទោះណាអ្នកនាំពាក្យក្រសួង ការងារ និងបណ្តុះបណ្តាលវិជា្ជជីវៈ បានធ្វើការបញ្ជាក់ និងស្នើសុំឱ្យស្ថាប័នសារព័ត៌មានដែលបានផ្សាយព័ត៌មាន មិនពិតធ្វើការកែតម្រូវឡើងវិញដោយបញ្ជាក់ថា បុគ្គលឈ្មោះ ហេង សួរ នោះ ពុំមែនជា ឯកឧត្តម ហេង សួរ រដ្ឋមន្ត្រីក្រសួង ការងារ និងបណ្តុះបណ្តាលវិជ្ជាជីវៈនោះទេ។

គួររំលឹកថា បុគ្គលនីណាក់ កាលពីថ្ងៃទី១២ ខែធ្នូ ឆ្នាំ២០២៣ បានបង្ហោះខ្លឹមសារលើបណ្តាញសង្គមផ្លូវការរបស់ខ្លួនថា “តើលោក ហេង សួរ បានសាងស្នាដៃធំធេងអ្វីដល់ជាតិខ្មែរ បានជារដ្ឋាភិបាលកាត់ដីព្រៃផ្ដល់ឱ្យធ្វើជាកម្មសិទ្ធិ? RIP ព្រៃឈើខ្មែរ”។ ការសរសេរព័ត៌មានមិនពិតនេះ ត្រូវបានយល់យ៉ាងច្បាស់ថា ដើម្បីទាក់ទាញការចាប់អារម្មណ៍ពីមហាជនឲ្យយល់ខុស និងមានចេតនាបំផ្លាញកិត្តិយសអ្នកដទៃដើម្បីបង្កើតជាប្រយោជន៍បុគ្គលផ្ទាល់ខ្លួន។

សម្រាប់ករណីនេះ សាលាដំបូងបានគូសបញ្ជាក់ថា ៖ “ការបង្ហោះខ្លឹមសារទាំងនេះ គឺជាការមួលបង្កាច់ការពិត ដែលមិនត្រឹមតែធ្វើឱ្យប៉ះពាល់ដល់ កិត្តិយស និងសេចក្តីថ្លៃថ្នូររបស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈប៉ុណ្ណោះទេ ប៉ុន្តែការបង្ហោះព័ត៌មានមួលបង្កាច់ការពិតម្ដងហើយម្ដងទៀត ដោយមិនព្រមធ្វើការកែតម្រូវឡើងវិញនេះ គឺជាចេតនា ទុច្ចរិតក្នុងការធ្វើឱ្យមានការភាន់ច្រឡំ និងញុះញង់ឱ្យមានការរើសអើងចំពោះឯកឧត្តម ហេង សួរ និងថ្នាក់ដឹកនាំ អំពើនេះគឺជាបទល្មើស ដែលមានបញ្ញត្តិឱ្យផ្ដន្ទាទោសតាមក្រមព្រហ្មទណ្ឌនៃព្រះរាជាណាចក្រកម្ពុជា”។ ក្នុងសំណុំរឿងនេះ តុលាការបានផ្តន្ទាទោសបុគ្គលនីណាក់ឱ្យជាប់ពន្ធនាគារ កំណត់រយៈពេល ១៨ខែពីបទ "ញង់ញុះ ឱ្យប្រព្រឹត្តបទឧក្រិដ្ឋជាអាទិ៍"៕