ខេត្តពោធិ៍សាត់ ៖ នៅថ្ងៃទី៧ ខែមករា ឆ្នាំ២០២៤នេះ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ បានអញ្ជើញជាអធិបតីភាពពិធីអបអរសាទរខួបអនុស្សាវរីយ៍លើកទី៤៥ នៃទិវាជ័យជម្នះ៧មករា (៧ មករា ១៩៧៩ - ៧ មករា ២០២៤) ដែលបានរៀបចំធ្វើឡើងនៅលើបុរីវប្បធម៌កោះសំពៅមាស ក្រុងពោធិ៍សាត់ ដោយមានមន្ត្រីរាជការ សិស្សានុសិ្ស និងប្រជាពលរដ្ឋអញ្ជើញចូលរួមប្រមាណ៣០០០នាក់ ។

បន្ទាប់ពី ឯកឧត្តម ខូយ រីដា ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ បានឡើងអានសុន្ទរកថារបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជាក្នុងឱកាសអបអរសាទរខួបអនុស្សាវរីយ៍លើកទី៤៥ ទិវាជ័យជម្នះ ៧មករា រួចមក ក៏មានការសម្តែងឈុតឆាក “រឿងស្រមោលខ្មៅ” ដែលបានឆ្លុះបញ្ចាំងពីតថភាព ក្នុងរបបប្រល័យពូជសាសន៍ដ៏ខ្មៅងងឹត ដែលរៀបចំដឹកនាំសម្តែងដោយមន្ទីរវប្បធម៌និងវិចិត្រសិល្បៈខេត្តពោធិ៍សាត់ ។

ក្នុងឱកាសនោះ ឯកឧត្តម កែវ រតនៈ មានប្រសាសន៍លើកឡើងថា អង្គមិទ្ទិញយើងថ្ងៃនេះពិតជាមានអត្តន័យធំធេងណាស់ ព្រោះជាឱកាសរំលឹកឡើងវិញនូវមហាជ័យជម្នះ៧មករា១៩៧៩ លើរបបបនប្រល័យពូជសាន៍ប៉ុលពត។ យើងបានកសាងប្រទេសពីបាតដៃទទេ ដែលមានសម្ដេចតេជោ ហ៊ុន សែន និងឥស្សរជនមួយចំនួនទៀត បានខិតខំប្រឹងប្រែងដៃម្ខាងទប់សង្គ្រាមដៃម្ខាងអភិវឌ្ឍប្រទេស រហូតមានអ្វីៗគ្រប់យ៉ាងមកដល់សព្វថ្ងៃនេះ។ ក្នុងអាណត្តិទី៧នេះ រាជរដ្ឋាភិបាលដែលដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននឹងកំពុងខិតខំប្រឹងប្រែងបន្តទៀត ដើម្បីធ្វើយ៉ាងណាឲ្យប្រទេសជាតិកាន់តែរីចំរើន និងប្រជាពលរដ្ឋរស់នៅមានសេចក្ដីសុខ។ ឯកឧត្តម កែវ រតនៈ ថានឹងទំនាក់ទំនងនាំយករោងចក្រមកដាក់នៅខេត្តពោធិ៍សាត់បន្ថែមទៀត ដើម្បីកូនចៅប្រជាពលរដ្ឋមានការងារធ្វើ ទទួលបានប្រាក់ខែនិងប្រាក់ចំណូលប្រចាំថ្ងៃ សម្រាប់ផ្គត់ផ្គង់ជីវភាពគ្រួសារ។ ជាមួយគ្នានេះឃុំអូរសោម ឃុំប្រមោយ និងឃុំថ្មដា ស្រុកវាលវែង ក៍នឹងត្រូវអភិវឌ្ឍន៍ឲ្យក្លាយទៅជាតំបន់សេដ្ឋកិច្ចពិសេស តំបន់ទេសចរណ៍ ដើម្បីទាក់ទាញភ្ញៀវទេសចរណ៍មកលេងកំសាន្តឲ្យកាន់តែច្រើនទៅថ្ងៃអនាគត។

 ឯកឧត្តម កែវ រតនៈ សូមឲ្យបងប្អូនប្រជាពលរដ្ឋ រួមគ្នាថែរក្សាសន្តិភាពឲ្យនៅគង់វង្សជានិច្ច ដើម្បីផ្ដល់ឱកាសឲ្យរាជរដ្ឋាភិបាល ដែលដឹកនាំដោយសម្ដេចបវរធិបតី ហ៊ុន ម៉ាណែត បន្តអភិវឌ្ឍន៍ប្រទសឲ្យកាន់តែរីកចំរើនថែមទៀត៕

អត្ថបទ៖ ភិរុណ ពៅ