នៅថ្ងៃទី៨ ខែមករានេះ និស្សិតអាហារូបករណ៍នឹងទៅសិក្សានៅប្រទេសណូវែលហ្សេឡង់ចំនួន ៣៥រូប បានអញ្ជើញទទួលជួបសំណេះសំណាលណែនាំការងារវិស័យទេសចរណ៍ ពីឯកឧត្តម សុខ សូកេន រដ្ឋមន្ត្រីក្រសួងទេសចរណ៍។ ក្រោយជំនួបបណ្តានិស្សិត បានប្តេជ្ញា​ចិត្ត​ធ្វើ​ជា​ទូត​ដ៏​ល្អ​បំ​ផុត ផ្សព្វផ្សាយគោលដៅទេសចរណ៍កម្ពុជា ទាក់ទាញមិត្តភ័ក្តិបរទេស និង​ទេសចរ​អន្តរជាតិ​មក​ទស្សនា​កម្ពុជា។

បណ្តានិស្សិតថ្លែងថា នៅពេលនេះពួកគេ​បាន​ទទួល​អនុសាសន៍​ណែនាំ​ជា​ច្រើន​អំពី​សក្តានុពល​ទេសចរណ៍​កម្ពុជា និងការអនុវត្តគោល​នយោបាយ​លើក​ទឹកចិត្ត​ទាក់​ទាញ​ទេសចរ​អន្តរជាតិ​មក​ទស្សនា​កម្ពុជា ហើយនៅក្នុងដំណើរអញ្ជើញទៅសិក្សាថ្នាក់ក្រោយឧត្តមសិក្សានៅប្រទេស ណូវែលហ្សេឡង់នេះនឹងជួបនិស្សិតមកពីបណ្តាប្រទេសផ្សេងៗជាច្រើន ហើយពួកគេនឹង​ខិតខំ​ប្រឹងប្រែង​ផ្សព្វ​ផ្សាយ​គោល​ដៅ​ទេសចរណ៍​កម្ពុជា​ជូន​មិត្ត​រួម​ថ្នាក់​ក៏​ពលរដ្ឋ​បរទេស​នានា​ទៀត​មក​ទស្សនា​ក​ម្ពុជា។

នៅក្នុងជំនួបជាមួយក្រុមនិស្សិត ឯកឧត្តម សុខ សូកេន រដ្ឋមន្ត្រីក្រសួង​ទេសចរណ៍​ថ្លែង​ការ​អបអរ​សាទរ​ចំពោះសិស្សនិស្សិតជ័យលាភីទាំង៣៥រូប ដែលទទួលបានអាហារករណ៍ថ្នាក់បណ្ឌិត និង​អនុ​បណ្ឌិត ទៅសិក្សានៅប្រទេសនូវែលសេឡង់សម្រាប់ឆ្នាំសិក្សា២០២៤-២០២៥ ហើយ​ឯក​ឧត្តម បានវាយតម្លៃខ្ពស់ចំពោះនិស្សិតទាំងអស់ដែលជាកូនខ្មែរអ្នកបន្តវេនដ៏មានសក្តានុពល និង​សមត្ថភាព​ខ្ពស់អាចចាប់យកឱកាសអាហារូបករណ៍របស់រដ្ឋាភិបាលនូវែលសេឡង់។

ឯកឧត្តម សុខ សូកេន ថ្លែងថា តាមរយៈការទទួលបានអាហារូបករណ៍ សិស្សនិស្សិត​ទាំង​អស់​នឹង​ក្លាយ​ជា​ទូតនាំសារផ្សព្វផ្សាយពីវប្បធម៌ អរិយធម៌និងសក្តានុពលវិស័យទេសចរណ៍កម្ពុជា លើឆាក​អន្តរជាតិ ដូច្នេះសិស្សនិស្សិតទាំងអស់ត្រូវមានទំនាក់ទំនល្អ អត្តរចរឹកស្លូតបូត និងរួសរាយ​រាក់​ទាក់ និងចូលរួមថែរក្សាវប្បធម៌-ប្រពៃណី និងមោទនភាពជាខ្មែរអំឡុងពេលស្នាក់នៅ និង​សិក្សា​នៅ​ប្រទេស​នូវែលសេឡង់ ជាពិសេសផ្សព្វផ្សាយមោទកភាពជាប្រជាជនខ្មែរ "ប្រទេសតូច បេះដូង​ទូលាយ​” និងនាំសារល្អៗពីកម្ពុជាលើឆាកអន្តរជាតិ៕ អត្ថបទ ស៊ុម សុខជា