ភ្នំពេញ៖ គិតចាប់ពីឆ្នាំ១៩៩៧ រហូតត្រឹមបំណាច់ឆ្នាំ២០២៣ កម្ពុជា​ទទួល​បាន​គម្រោង​វិនិយោគ​ក្នុង​ការ​បង្កើត​រោងចក្រ សហគ្រាសសរុបចំនួន ៤០,៨៤០រោងចក្រ សហគ្រាស និងមានកម្មករ​និយោជិត​សរុប​ប្រមាណ ១,៧លាននាក់។ នេះតាមការបញ្ជាក់របស់ ឯកឧត្តម ហេង សួរ រដ្ឋមន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ។

នៅក្នុងកម្មវិធីដាក់ឲ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួប​សំណេះ​សំណាល​ជា​មួយ​កម្មករនិយោជិតចំនួនជាង ១ម៉ឺននាក់ នៅភូមិនាងកុក ឃុំប៉ាក់ខ្លង ស្រុកមណ្ឌល​សីមា ខេត្តកោះកុង ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាល​ពីព្រឹកថ្ងៃទី៨ ខែមករា ឆ្នាំ២០២៤នេះ ឯកឧត្តមរដ្ឋមន្រ្តី លើកឡើងបន្តថា ដោយសារ​ប្រទេស​កម្ពុជា​សម្រេច និងរក្សាបាននូវចីរភាពនៃសុខសន្តិភាពពេញលេញ ស្ថិរភាពនិយោបាយ និង​ការអភិវឌ្ឍលើគ្រប់វិស័យគួរជាទីមោទនៈ បានទាក់ទាញ​អ្នក​វិនិយោគ​ជា​ច្រើន​ឲ្យ​មក​បណ្តាក់​ទុន​ក្នុង​ស្រុក ព្រមទាំងផ្តល់ឱកាសការងារជាច្រើនកន្លែងផងដែរជូនដល់ប្រជាពលរដ្ឋក្នុងស្រុក។

ឯកឧត្តមរដ្ឋមន្រ្តី មានប្រសាសន៍បន្តថា តាមរយៈការកសាងផ្លូវគមនាគមន៍ ស្ពាន និងហេដ្ឋា​រចនា​សម្ព័ន្ធ​ជា​បន្តបន្ទាប់ រោងចក្រ សហគ្រាសក៏ត្រូវបានបង្កើត បង្កើន និងពង្រីកទៅ​តាមបណ្តា​ខេត្ត​នានា​។ ឯកឧត្តម បន្ថែមថា សម្រាប់វិស័យវាយនភណ្ឌ កាត់ដេរ ផលិតស្បែកជើង និងផលិត​ផល​ធ្វើ​ដំណើរ​ និងកាបូប គិតត្រឹមឆ្នាំ២០២៣កន្លងទៅ មានចំនួន ១,៦៨០រោងចក្រ និងមានកម្មករ​និយោជិត​សរុប​ចំនួនជាង ៩១ម៉ឺននាក់ ដោយបានប្រាក់ឈ្នួលប្រចាំឆ្នាំប្រមាណ ២,៩ពាន់​លាន​ដុល្លារ​។

ដោយឡែក ពាក់ព័ន្ធលក្ខខណ្ឌការងារ និងជីវភាពរស់នៅរបស់កម្មករនិយោជិត ឯកឧត្តមរដ្ឋមន្រ្តី បានបញ្ជាក់ថា ត្រូវបានគិតគូរនិងលើកម្ពស់កាន់តែប្រសើរឡើង ប្រាក់ឈ្នួលអប្បបរមាបានកើនពី ៤០ដុល្លារ នៅឆ្នាំ១៩៩៧ ដល់ ២០៤ដុល្លារ នៅឆ្នាំ២០២៤៕ អត្ថបទ៖ឈិត បូរ៉ាវី