ឯកឧត្ដមរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា គិតចាប់​ពី​ប្រកាស​ដាក់​ឲ្យ​ដំណើរ​ការ​ជាផ្លូវការកម្មវិធីបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និង​គ្រួសារ​ងាយរងហានិកភ័យ នៅថ្ងៃទី១៤ ខែវិច្ឆិកា ឆ្នាំ២០២៣ រហូតត្រឹមថ្ងៃទី៧ ខែមករា ឆ្នាំ​២០២៤ យុវជនបានមកចុះឈ្មោះដើម្បីរៀន មានចំនួន ២១,៥៩៥នាក់។

ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅក្នុង​កម្ម​វិធី​ដាក់​ឲ្យ​ប្រើ​ប្រាស់​ជា​ផ្លូវ​ការ​ស្ពានសម្តេចតេជោ ហ៊ុន សែន កោះយ៉ និងជួបសំណេះសំណាល​ជាមួយ​កម្មករ​និយោជិត​ចំនួន​ជាង ១ម៉ឺននាក់ នៅស្រុកមណ្ឌលសីមា ខេត្តកោះកុង ក្រោមអធិបតីភាព​សម្តេច​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៨ ខែមករានេះ បានមានប្រសាសន៍ថា ក្នុង​ចំនួនខាងលើនេះ យុវជនចុះឈ្មោះ មកពីរាជធានីភ្នំពេញ មានចំនួន ៨,៣៥៣នាក់ , ខេត្តបាត់​ដំបង ២,៦៩៩នាក់ , សៀមរាប ១,៦១២នាក់ , កណ្តាល ៧៧៦នាក់ , ព្រះសីហនុ ៧៥៥នាក់ និងបណ្តាខេត្តផ្សេងៗចំនួន ៧,៤០០នាក់។ ឯកឧត្តម បានបញ្ជាក់ទៀតថា ក្រសួង​ការងារ នឹងចាប់ផ្តើមបើកវគ្គបណ្តុះបណ្តាលជំហ៊ានដំបូងនាពេលដ៏ខ្លីខាងមុខនេះ ចំនួន ៥០០​ថ្នាក់។

សូមបញ្ជាក់ថា ដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និង​បច្ចេកទេស​ឲ្យ​កាន់​តែ​មាន​ប្រសិទ្ធិភាព​បន្ថែមទៀត ក្រសួងការងារ និងបណ្តុះបណ្តាលវិជ្ជាជីវៈ បានចុះហត្ថលេខា​លើ​អនុស្សរណៈ នៃ​ការយោគយល់គ្នា ជាមួយសភាពាណិជ្ជកម្មកម្ពុជា និងសមាគមនិយោជក​ចំនួន​១៧ ដើម្បីបង្កើតកិច្ចសហប្រតិបត្តិការ រវាងវិស័យរដ្ឋ និងវិស័យឯកជន ក្នុងការផ្តល់ជំនាញ បង្កើន​ជំនាញ ផ្លាស់ប្តូរជំនាញ និងបង្កើនផលិតភាពការងារ ដើម្បីធានាថា ពលរដ្ឋ​កម្ពុជា​មាន​ជំនាញ​មួយ​ពិត​ប្រាកដ ដែលអាចទទួលបានការងារ និងមុខរបរសមរម្យ និងមាន​ស្ថិរភាព​ចំណូល​ស្រប​តាម​ការ​អំពាវនាវរបស់សម្តេចនាយករដ្ឋមន្រ្តីកម្ពុជា៕ អត្ថបទ៖ឈិត បូរ៉ាវី