UN៖ អង្គការសហប្រជាជាតិបានព្រមានថា ក្រុមយុទ្ធជនតាលីបង់បានដណ្ដើមកាន់កាប់ស្រុកជាច្រើននៅក្នុងប្រទេសអាហ្វហ្គានីស្ថាន ខណៈដែលពួកគេបង្កើនការវាយប្រហារ អំឡុងពេលការដកកងទ័ពបរទេសដំណាក់កាលចុងក្រោយ។
ប្រេសិតពិសេសរបស់អង្គការសហប្រជាជាតិ លោកស្រី Deborah Lyons បានប្រាប់ក្រុមប្រឹក្សាសន្តិសុខដោយព្រមានពី “សេណារីយ៉ូដ៏ធ្ងន់ធ្ងរ” ថា ក្រុមបះបោរបានកាន់កាប់ស្រុកជាង ៥០ ក្នុងចំណោមស្រុកសរុបចំនួន ៣៧០ ចាប់តាំងពីខែឧសភា។ លោកស្រីបាននិយាយថា ជម្លោះកើនឡើង "មានន័យថា ការកើនឡើងអសន្តិសុខសម្រាប់បណ្ដាប្រទេសជាច្រើននៅជិត និងឆ្ងាយ"។ សហរដ្ឋអាមេរិក និងអង្គការណាតូនៅតែមានគោលដៅដកកងទ័ពទាំងស្រុងនៅត្រឹមថ្ងៃទី១១ ខែកញ្ញា។
ទោះយ៉ាងណាអ្នកនាំពាក្យមន្ទីរបញ្ចកោណ លោក John Kirby បាននិយាយថា ស្ថានការណ៍នៅតែមាន “គ្មានការផ្លាស់ប្ដូរ” ហើយទោះបីជាក្រុមតាលីបង់មានសកម្មភាពខ្លាំងក៏ដោយ ក៏អាមេរិកនៅតែមិនកែប្រែផែនការដកកងទ័ពដែរ ដោយនៅតែមានភាពបត់បែនក្នុងការផ្លាស់ប្ដូរ“ល្បឿន និងដែនអនុវត្តន៍” របស់ខ្លួន។ លោកស្រី Lyons បានប្រាប់ក្រុមប្រឹក្សាសន្តិសុខអង្គការសហប្រជាជាតិដែលមានសមាជិក ១៥ប្រទេសនៅទីក្រុងញូវយ៉កថា ការកើនឡើងសកម្មភាពថ្មីៗរបស់ក្រុមអ៊ីស្លាមនិយមគឺដោយសារតែ “យុទ្ធនាការយោធាកាន់តែខ្លាំងឡើង”៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
