ក្នុងដំណើរបំពេញទស្សនកិច្ច នៅទីក្រុងគីវ រដ្ឋមន្ត្រីការបរទេសជប៉ុន លោកស្រី Yoko Kamikawa បានសន្យាគាំទ្រអ៊ុយក្រែន ក្នុងការបន្តការពារប្រឆាំងនឹងការឈ្លានពានរបស់រុស្ស៊ី។

លោកស្រី Kamikawa បានថ្លែងនៅក្នុងសន្និសីទសារព័ត៌មានរួមគ្នាជាមួយសមភាគីរបស់ខ្លួន លោក Dmytro Kuleba កាលពីថ្ងៃអាទិត្យថា ប្រទេសជប៉ុន នឹងផ្តល់ប្រាក់ចំនួន ៣៧លានដុល្លារទៅក្នុងមូលនិធិរបស់អង្គការណាតូ នេះបើយោងតាមប្រព័ន្ធផ្សព្វផ្សាយអ៊ុយក្រែន។

លោកស្រី បាននិយាយថា ប្រាក់នេះ នឹងផ្តល់អត្ថប្រយោជន៍ដល់ការការពារដែនអាកាសរបស់អ៊ុយក្រែន និងហូរចូលទៅក្នុងប្រព័ន្ធស្ទាក់ចាប់យានដ្រូនផងដែរ។ ប្រទេសរុស្ស៊ី បានវាយប្រហារលើប្រទេសជិតខាង ដោយយានដ្រូនទ្រង់ទ្រាយធំអស់រយៈពេលជាច្រើនខែហើយ។

ប្រទេសជប៉ុន កំពុងគាំទ្រអ៊ុយក្រែនក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី ដែលបានបន្តអស់     រយៈពេលជិតពីរឆ្នាំហើយ ក៏បានដាក់ទណ្ឌកម្មប្រឆាំងនឹងរុស្ស៊ីស្របតាមប្រទេសលោកខាងលិចផងដែរ។

លោក Yoshimasa Hayashi ដែលជាអ្នកស្នងតំណែងមុនរបស់លោកស្រី Kamikawa និងនាយករដ្ឋ      មន្ត្រីជប៉ុន លោក Fumio Kishida ក៏បានធ្វើទស្សនកិច្ចនៅអ៊ុយក្រែនសម្រាប់កិច្ចពិភាក្សា កាលពីប៉ុន្មានខែមុន។ ទោះជាយ៉ាងណាក៏ដោយ រដ្ឋធម្មនុញ្ញសន្តិភាពរបស់ប្រទេសនេះ មិនអនុញ្ញាតឲ្យប្រទេសជប៉ុនផ្គត់ផ្គង់អាវុធដល់អ៊ុយក្រែនទេ។