ប្រទេសចិន បាននិយាយថា ភ្នាក់ងារសន្តិសុខរបស់ខ្លួន បានរកឃើញឧប្បត្តិហេតុមួយទៀតនៃការធ្វើចារកម្ម ដែលសេវាចារកម្មរបស់អង់គ្លេស ឈ្មោះ MI6 បានប្រើប្រាស់ជនបរទេស នៅក្នុងប្រទេសចិន ដើម្បីប្រមូលព័ត៌មានសម្ងាត់ និងព័ត៌មានផ្សេងៗទៀត។

ករណីដោយប្រទេសចិននេះបង្ហាញពីការផ្លាស់ប្តូរបន្តកើនឡើងយ៉ាងខ្លាំងក្លា ដែលប្រទេសនានា បានធ្វើការចោទប្រកាន់គ្នាទៅវិញទៅមកពីបទធ្វើចារកម្ម ដែលគំរាមកំហែងដល់សន្តិសុខជាតិរៀងៗខ្លួន។

ក្រសួងសន្តិសុខរដ្ឋរបស់ប្រទេសចិន បានបង្ហាញនៅលើគណនីបណ្ដាញសង្គម WeChat របស់ខ្លួន នៅថ្ងៃចន្ទ (ទី៨ ខែមករា) នេះថា ជនបរទេសម្នាក់ដែលត្រូវបានគេស្គាល់អត្តសញ្ញាណដោយនាមត្រកូល Huang គឺជាអ្នកទទួលខុសត្រូវនៃទីភ្នាក់ងារប្រឹក្សាយោបល់ នៅបរទេស ហើយនៅក្នុងឆ្នាំ២០១៥ សេវាចារកម្មរបស់អង់គ្លេស MI6 បានបង្កើត «ទំនាក់ទំនងសហប្រតិបត្តិការស៊ើបការណ៍» ជាមួយបុគ្គលនោះ។

សេចក្តីថ្លែងការណ៍បាននិយាយថា បន្ទាប់ពីនោះ សេវាចារកម្ម M16 បានណែនាំលោក Huang ឲ្យចូលទៅក្នុងប្រទេសចិនជាច្រើនដង ហើយបានណែនាំរូបគេឲ្យប្រើអត្តសញ្ញាណសាធារណៈរបស់ខ្លួន ដើម្បីប្រមូលព័ត៌មានដែលទាក់ទងនឹងប្រទេសចិនសម្រាប់ចារកម្មអង់គ្លេស។

រដ្ឋាភិបាលចិន បាននិយាយថា MI6 ក៏បានធ្វើការបណ្តុះបណ្តាលជំនាញស៊ើបការណ៍សម្ងាត់ សម្រាប់លោក Huang ក្នុងប្រទេសអង់គ្លេស និងកន្លែងផ្សេងទៀត ហើយបានផ្តល់ឧបករណ៍ចារកម្មពិសេសសម្រាប់ការភ្ជាប់ទំនាក់ទំនងស៊ើបការណ៍សម្ងាត់។

រដ្ឋាភិបាលបានលើកឡើងថា៖ «បន្ទាប់ពីការស៊ើបអង្កេតយ៉ាងយកចិត្តទុកដាក់មក ស្ថាប័នសន្តិសុខរដ្ឋ បានរកឃើញភ័ស្តុតាងនៃការជាប់ពាក់ព័ន្ធរបស់លោក Huang នៅក្នុងសកម្មភាពចារកម្ម ហើយបានចាត់វិធានការបង្ខិតបង្ខំឧក្រិដ្ឋកម្មប្រឆាំងនឹងរូបគាត់»៕