ការវាយប្រហារដែលកំពុងបន្តលើនាវាពាណិជ្ជកម្មនៅសមុទ្រក្រហមដោយក្រុមឧទ្ទាមហួទីគាំទ្រដោយអ៊ី    រ៉ង់ កំពុងបង្កភាពចលាចលសម្រាប់ខ្សែសង្វាក់ផ្គត់ផ្គង់ពិភពលោក ប៉ុន្តែការនាំចេញប្រេងរបស់អាមេរិក ហាក់ដូចជាទទួលបានអត្ថប្រយោជន៍ពីពួកគេទៅវិញ។

លោក Robert Yawger នាយកប្រតិបត្តិសម្រាប់ហ៊ុនថាមពលនៅក្រុមហ៊ុន Mizuho Securities USA បានសរសេរនៅក្នុងកំណត់ត្រាមួយនៅក្នុងសារព័ត៌មាន Market Watch កាលពីថ្ងៃព្រហស្បតិ៍ថា នោះដោយសារតែតម្រូវការអន្តរជាតិ បានផ្លាស់ប្តូរទៅការផ្គត់ផ្គង់ប្រេងដ៏ច្រើនរបស់សហរដ្ឋអាមេរិក ដែលជា «ផ្លូវសុវត្ថិភាព និងថោកជាង ក្នុងការទទួលបានការផ្គត់ផ្គង់ ជាពិសេសសម្រាប់អតិថិជន EU»។ 

ដោយសារការវាយប្រហារ នាវាជាច្រើន កំពុងប្តូរទិសដៅពីសមុទ្រក្រហមដែលតភ្ជាប់ទៅព្រែកជីកស៊ុយអេ (Suez) ដែលផ្លូវទំនាក់ទំនងពាណិជ្ជកម្មដ៏សំខាន់រវាងអាស៊ី និងអឺរ៉ុបទៅឆ្នេរសមុទ្រ Cape of Good Hope នៅអាហ្វ្រិកខាងត្បូង ប៉ុន្តែនេះធ្វើឱ្យការធ្វើដំណើរកាន់តែយូរ និងមានតម្លៃកាន់តែថ្លែ។

ដូច្នេះ អ្នកទិញជាច្រើនហាក់ដូចជាគ្រាន់តែទិញប្រេងពីសហរដ្ឋអាមេរិកជំនួសឱ្យមជ្ឈិមបូព៌ា។ ការនាំចេញប្រេងរបស់សហរដ្ឋអាមេរិក បានកើនឡើង ៣៥ភាគរយ ក្នុងសប្តាហ៍ដល់ជិត ៥,៣ លានបារ៉ែលក្នុងមួយថ្ងៃសម្រាប់សប្តាហ៍ ដែលបានបញ្ចប់នៅថ្ងៃទី ២៩ ខែធ្នូ នេះបើយោងតាមរដ្ឋបាលព័ត៌មានថាមពលរបស់សហរដ្ឋអាមេរិក។ នេះជាលើកទី១ ហើយដែលការនាំចេញរបស់អាមេរិក បានកើនឡើង ចាប់តាំងពីក្រុម ហួទី បានចាប់ផ្តើមការវាយប្រហារនៅសមុទ្រក្រហមរបស់ពួកគេ កាលពីពាក់កណ្តាលខែវិច្ឆិកា។