តុលាការកំពូលរបស់ប្រទេសឥណ្ឌា នៅថ្ងៃចន្ទ (ទី៨ ខែមករា) នេះ បានលុបចោលនូវការលើកលែងទោសពាក់ព័ន្ធនឹងបុរសហិណ្ឌូ ១១នាក់ ដែលត្រូវបានផ្តន្ទាទោសឲ្យជាប់ពន្ធនាគារអស់មួយជីវិតពីបទរំលោភបូកស្ត្រីមូស្លីមមានផ្ទៃពោះ និងសម្លាប់សាច់ញាតិរបស់នាង ក្នុងអំឡុងពេលមានកុបកម្មហិណ្ឌូ-មូស្លីម នៅរដ្ឋ Gujarat ក្នុងឆ្នាំ ២០០២។ តុលាការក៏បានបង្គាប់ឲ្យបុរសទាំងនោះប្រគល់ខ្លួនឲ្យអាជ្ញាធរពន្ធនាគារក្នុងរង្វង់ ២សប្តាហ៍។

ជនរងគ្រោះឈ្មោះ Bilkis Bano មានផ្ទៃពោះ ៣ខែ នៅពេលដែលនាងត្រូវបានរំលោភបូក ហើយសាច់ញាតិរបស់នាង ៧នាក់ ក្នុងនោះរួមទាំងកូនស្រីអាយុ ៣ឆ្នាំរបស់នាងផងដែរ ត្រូវបានសម្លាប់ ក្នុងពេលមានកុបកម្ម ដែលបានកើតឡើងពាសពេញរដ្ឋ ដោយបានសម្លាប់មនុស្សជាង ១.០០០នាក់ ដែលភាគច្រើនជាអ្នកកាន់សាសនាឥស្លាម។ នាយករដ្ឋមន្ត្រី លោក Narendra Modi គឺជារដ្ឋមន្ត្រីប្រចាំរដ្ឋ Gujarat នាពេលនោះ ហើយគណបក្សជាតិនិយមហិណ្ឌូ Bharatiya Janata របស់លោក នៅតែគ្រប់គ្រងរដ្ឋនេះ។

ក្រុមបុរសដែលត្រូវបានកាត់ទោស កាលពីដើមឆ្នាំ២០០៨ ត្រូវបានបញ្ជាឲ្យដោះលែង ដោយរដ្ឋាភិបាលប្រចាំរដ្ឋ Gujarat ក្នុងខែសីហា ឆ្នាំ២០២២ បន្ទាប់ពីពន្ធនាគារ ដែលពួកគេជាប់ឃុំឃាំង ផ្តល់អនុសាសន៍ឲ្យដោះលែងពួកគេដោយគិតពីពេលវេលាដែលពួកគេអនុវត្តទោស និងការប្រព្រឹត្តអាកប្បកិរិយាល្អរបស់ពួកគេ។

ការដោះលែងរបស់ពួកគេ បាននាំឲ្យមានការថ្កោលទោសពីប្តីជនរងគ្រោះ បណ្ដាមេធាវី និងអ្នកនយោបាយនានា។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ញត្តិជាច្រើនត្រូវបានដាក់នៅតុលាការកំពូល ដើម្បីជំទាស់នឹងការលើកលែងទោស ក្នុងនោះរួមទាំងញត្តិផ្ទាល់ពីជនរងគ្រោះផងដែរ។

នៅក្នុងសាលក្រមរបស់ខ្លួន នៅថ្ងៃចន្ទនេះ តុលាការបានចាត់ទុកថា រដ្ឋ Gujarat មិនមានសិទ្ធិអំណាច ក្នុងការកាត់បន្ថយការកាត់ទោស ដែលត្រូវបានសម្រេច ចាប់តាំងពីការកាត់ក្តីនៃសំណុំរឿងនេះ ត្រូវបានផ្លាស់ប្តូរទៅរដ្ឋធានីហិរញ្ញវត្ថុ Mumbai៕