កាលពីថ្ងៃអាទិត្យម្សិលមិញ នគរបាលអ៊ីស្រាអែល បានសម្លាប់ក្មេងស្រីប៉ាឡេស្ទីនវ័យក្មេងម្នាក់នៅក្នុងរថយន្ត ត្រង់ចំណុចផ្លូវឆ្លងកាត់ក្នុងតំបន់កាន់កាប់វ៉េសប៊ែង ពេលដែលពួកគេបាញ់រះលើរថយន្តមួយគ្រឿងទៀតដែលសង្ស័យថាបើកការវាយប្រហារដោយបើករថយន្តបុក ។

នគរបាលព្រំដែននិយាយថា ពួកគេបាញ់ត្រូវក្មេងស្រីក្រោយបាញ់ប្រហារមនុស្ស ២នាក់ប្តី-ប្រពន្ធនៅក្នុងរថយន្តដែលពួកគេនិយាយថា បានបើកបុកអ៊ីស្រាអែលនៅត្រង់ចំណុចផ្លូវឆ្លងកាត់ស្ថិតក្នុងតំបន់វ៉េសប៊ែង ។

ទាហានប៉ារ៉ាអ៊ីស្រាអែល និយាយថា ក្មេងស្រីម្នាក់នេះមានអាយុ ៣ឆ្នាំ ប៉ុន្តែប្រភពព័ត៌មានប៉ាឡេស្ទីន និយាយប្រាប់ទីភ្នាក់ងារព័ត៌មានផ្លូវការប៉ាឡេស្ទីន WAFA ថា នាងមានអាយុ ៤ឆ្នាំ ។

ពួកគេបន្តថា សេវាកម្មរថយន្តគិលានសង្រ្គោះអ៊ីស្រាអែល និយាយថា ក្មេងស្រីត្រូវបានព្យាបាលនៅកន្លែងកើតហេតុ ប៉ុន្តែក្រោយមកត្រូវបានគេប្រកាសថានាងស្លាប់ ដោយពុំបញ្ជាក់ឲ្យបានច្បាស់លាស់ពីមូលហេតុបណ្តាលឲ្យនាងស្លាប់នោះឡើយ ។ ចំណែកឯជនជាតិអ៊ីស្រាអែលម្នាក់ បានរងរបួសស្រាល ។

សេចក្តីថ្លែងការណ៍ពីនគរបាលអ៊ីស្រាអែល បាននិយាយថា រថយន្តមួយគ្រឿងមានបុរសម្នាក់ និងស្រ្តីម្នាក់ បានបើកជិតទីក្រុងហ៊្សេរុយសាឡឹម ហើយបានបើកការវាយប្រហារបើករថយន្តបុកលើនគរបាលព្រំដែន ហើយនគរបាល បានឆ្លើយតបវិញជាមួយនឹងការបាញ់រះ ។

ពួកគេនិយាយថា នគរបាលបានសម្លាប់មនុស្សទាំង ២នាក់នៅក្នុងរថយន្ត ដោយពុំផ្តល់សេចក្តីលម្អិតណាមួយនោះឡើយ ខណៈដែលប្រភពព័ត៌មានពីប៉ាឡេស្ទីននិយាយប្រាប់សារព័ត៌មាន WAFA ថា ប្តី-ប្រពន្ធ ២នាក់នេះ ត្រូវបានសម្លាប់អំឡុងការបាញ់ប្រហារ ៕