ប្រជាពលរដ្ឋ និងយុវជន បានអះអាងថា បើគ្មានមហាជ័យជម្នះ៧ មករា ១៩៧៩ទេ យើង​មិន​មាន​អ្វី​ៗទាំងអស់ដូចថ្ងៃនេះទេ នេះជាសច្ចៈធម៌​ប្រវតិ្តសាស្រ្ត​ដែល​មិន​អាច​បុគ្គល​ណា​បដិសេធ​បាន​ឡើយ។

ការលើកឡើងរបស់ប្រជាពលរដ្ឋ និងយុវជនកាយរិទ្ធកម្ពុជា និងយុវជនកាកបាទក្រហមកម្ពុជា នៃ​វិទ្យាល័យជ័យវរ្ម័នទី៧ ក្នុងស្រុកកៀនស្វាយ ខេត្តកណ្តាល យ៉ាងដូច្នេះ បាន​ធ្វើ​ឡើង​ក្នុង​កម្ម​វិធី​ប្រារព្ធ​ពិធីអបអរសាទររំលឹកខួបអនុស្សាវរីយ៍លើកទី៤៥ នៃទិវាបុណ្យជាតិ៧មករា នាព្រឹកថ្ងៃទី៩ ខែ​មករា ឆ្នាំ២០ ២៤។ ពួកគាត់បន្តថា ក្នុងនាមជាកូនចៅជំនាន់ក្រោយ បានយល់ដឹង ចងចាំ​ជា​និច្ច និងចាត់ទុកថា បើគ្មានមហាជ័យជម្នះ៧មករា ១៩៧៩ទេ យើង​គ្មាន​អ្វីៗ​ទាំង​អស់​ដូច​ថ្ងៃ​នេះ​ទេ, នេះជាសច្ចៈធម៌ប្រវតិ្ត សាស្រ្ត ដែលមិនអាចបុគ្គលណាបដិសេធបានឡើយ។

ក្នុងពិធីនោះដែរ ឯកឧត្តម សែ សុខន អនុ​ប្រធាន​ក្រុម​ការងារ​រាជ​រដ្ឋាភិបាល​ចុះ​មូលដ្ឋាន​ស្រុក​កៀនស្វាយ ខេត្តកណ្ដាល ក៏បានអានសុន្ទរកថា​ដ៏មាន​អត្ថន័យ​យ៉ាង​ជ្រាល​ជ្រៅ​របស់​សម្តេច​អគ្គ​មហា​សេនា​បតីតេជោ ហ៊ុន សែន ប្រធានគណបក្សប្រជាជនកម្ពុជា ដោយរំលេចឱ្យដឹងថា ថ្ងៃទី៧ ខែ​មករា ឆ្នាំ២០ ២៤ គឺជាខួបលើកទី៤៥ ដែលប្រទេសកម្ពុជាត្រូវបានសង្គ្រោះ និង​រំដោះ​ចេញ​ផុត​ពី​របបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ដឹកនាំដោយ ប៉ុល ពត ដែល​បាន​ប្រែ​ក្លាយកម្ពុជា ទៅជាវាលពិឃាតដ៏ខ្មៅងងឹតអស់រយៈពេល ៣ឆ្នាំ ៨ខែ និង២០ថ្ងៃ។ ប៉ុ​ន្តែ​ក្រោយ​ពីប្រទេសជាតិត្រូវបានរំដោះ នៅថ្ងៃ៧ មករា ឆ្នាំ១៩៧៩ ក្រោមការ​ដឹកនាំ​របស់​គណបក្ស​ប្រជាជន​កម្ពុជា និងការដាក់ចេញនយោបាយ ឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា ដែលជាស្ថាបនិក និង​មគ្គុទេសក៍​ឯក បាននាំមកនូវសុខសន្តិភាព ហើយពលរដ្ឋមា នសិទ្ធិសេរីភាពពេញលេញឡើងវិញ ប្រទេសជាតិទាំងមូលមានសុខសន្តិភាព និងការអភិវឌ្ឍរីកចម្រើ នគ្រប់វិស័យមកទល់សព្វថ្ងៃ។ ទន្ទឹម​នឹងនោះដែរ កម្ពុជាក៏មានកិត្យានុភាព និងមុខមាត់សារជាថ្មីលើឆាកអន្តរជាតិផងដែរ៕  អត្ថបទ រដ្ឋា