មេដឹកនាំកូរ៉េខាងជើង លោក គីម ជុងអ៊ុន ត្រូវបានគេជឿថាមានអាយុ ៤០ឆ្នាំហើយកាលពីថ្ងៃចន្ទ (០៨ មករា) ប៉ុន្តែប្រព័ន្ធផ្សព្វផ្សាយរដ្ឋបានបន្តភាពស្ងៀមស្ងាត់រាប់ទសវត្សរ៍របស់ខ្លួននៅថ្ងៃខួបកំណើតរបស់មេដឹកនាំរូបនេះ។

ថ្ងៃកំណើតរបស់លោក គីម ត្រូវបានគេជឿថាជាថ្ងៃទី០៨ ខែមករា ទោះបីជារបបសម្ងាត់របស់លោកមិនបានបញ្ជាក់កាលបរិច្ឆេទក៏ដោយ។ រដ្ឋាភិបាលសហរដ្ឋអាមេរិកបានចុះបញ្ជីឆ្នាំកំណើតរបស់លោក គីម នៅឆ្នាំ១៩៨៤ ដែលធ្វើឱ្យលោកមានអាយុ ៤០ឆ្នាំនៅឆ្នាំនេះ។

ថ្ងៃកំណើតរបស់ឪពុក និងជីតារបស់លោកគីម ដែលជាអ្នកគ្រប់គ្រងពីមុន គឺជាថ្ងៃបុណ្យជាតិនៅក្នុងរដ្ឋផ្តាច់ការនេះ។ ទន្ទឹមនឹងនោះ ថ្ងៃខែឆ្នាំកំណើតរបស់លោក គីម ជុងអ៊ុន តែងតែកន្លងផុតទៅដោយស្ងប់ស្ងាត់ ដោយមិនបាននិយាយនៅក្នុងប្រព័ន្ធផ្សព្វផ្សាយ ឬមិនដាក់នៅលើប្រតិទិនរបស់ប្រទេសនេះទេ។

ការបញ្ជាក់កាលបរិច្ឆេទរបស់មេដឹកនាំប្រទេសកូរ៉េខាងជើងនេះ បានកើតឡើងនៅក្នុងខែមករា ឆ្នាំ២០២០ បន្ទាប់ពីក្រុមអាជ្ញាធរបានទទួលស្គាល់ថាលោក គីម បានទទួលការស្វាគមន៍ខួបកំណើតពីអតីតប្រធានាធិបតីសហរដ្ឋអាមេរិកនៅពេលនោះ គឺលោក ដូណាល់ ត្រាំ (Donald Trump) ទោះបីជាពួកគេមិនបានបញ្ជាក់ពីកាលបរិច្ឆេទពិតប្រាកដក៏ដោយ៕