នៅថ្ងៃអង្គារនេះ រដ្ឋាភិបាលជប៉ុន បានអនុម័តកញ្ចប់ថវិកាសង្រ្គោះ ៤,៧៤ពាន់លានយ៉េន(ស្មើនឹង ៣៣លានដុល្លារ) ក្នុងការចំណាយពីថវិកាបម្រុងសារពើពន្ធ ដើម្បីគាំទ្រដល់ការងើបឡើងវិញពីការរញ្ជួយដីនៅឧបទ្វីប Noto ។

ថ្លែងក្នុងជំនួបជាមួយកងកម្លាំងគ្រោះមហន្តរាយពិសេស នាយករដ្ឋមន្រ្តីជប៉ុនលោក Fumio Kishida និយាយថា វិធានការដែលមានលទ្ធភាពទាំងអស់ គួរតែធ្វើឡើង ដើម្បីគាំទ្រលំហូរសាច់ប្រាក់រដ្ឋាភិបាលក្នុងស្រុក ដើម្បីផ្តល់ការផ្គត់ផ្គង់ជំនួយសង្រ្គោះគ្រោះរញ្ជួយដី ។

គួរឲ្យដឹងថា ការរញ្ជួយដីកម្រិត ៧,៦រ៉ិចទ័រ ដែលបានអង្រួនឧបទ្វីប Noto ស្ថិតក្នុងខេត្ត Ishikawa នៅតំបន់ឆ្នេរភាគខាងលិចប្រទេសជប៉ុន នៅថ្ងៃចូលឆ្នាំសកល បានសម្លាប់មនុស្សជាង ២០០នាក់ ធ្វើឲ្យវាក្លាយជាការរញ្ជួយដីសម្លាប់មនុស្សច្រើនបំផុត ចាប់តាំងពីការរញ្ជួយដីឆ្នាំ ២០១៦ នៅខេត្ត Kumamoto ស្ថិតនៅលើកោះភាគខាងត្បូង Kyushu ។

ស្ថានភាពអាកាសធាតុត្រជាក់ បានរារាំងកិច្ចខិតខំជួយសង្រ្គោះ និងផ្តល់ជំនួយ ពេលដែលសីតុណ្ហភាពខ្ពស់បំផុតនៅទីក្រុង Wajima មាន ៦អង្សាសេ ។

ក្រុមការងារជួយសង្រ្គោះនៅទីក្រុងរងផលប៉ះពាល់ Wajima ដោយសារការរញ្ជួយដីជប៉ុន បានបង្ហាញក្តីកង្វល់ថា សីតុណ្ហភាពធ្លាក់ចុះ និងលទ្ធភាពនៃការធ្លាក់ព្រិល អាចនឹងធ្វើឲ្យកាន់តែធ្ងន់ធ្ងរដល់កិច្ចខិតខំជួយសង្រ្គោះ និងការផ្តល់ជំនួយ ៕