ប្រទេសចិន និងឥណ្ឌាកំពុងព្យាយាមពង្រីកសមត្ថភាពកងទ័ពជើងទឹករបស់ពួកគេ ចំពេលមានការប្រកួតប្រជែងកាន់តែខ្លាំងឡើង នៅក្នុងតំបន់ឥណ្ឌូប៉ាស៊ីហ្វិក ដោយកំពុងធ្វើសមកម្មភាពឆ្ពោះទៅរកការដាក់ឲ្យដំណើរការនាវាផ្ទុកយន្តហោះទី៣។

វីដេអូចុងក្រោយបង្អស់នៃនាវាផ្ទុកយន្តហោះ Fujian ថ្មីរបស់ចិន ដែលចាក់ផ្សាយដោយទូរទស្សន៍រដ្ឋ CCTV កាលពីថ្ងៃទី២ ខែមករា បានបង្ហាញពីអ្វីដែលមើលទៅដូចជាផ្លូវរត់ចំនួន៣ នៅលើនាវានេះ។ ក្នុងអត្ថបទខែវិច្ឆិកា របស់សារព័ត៌សមាន Ming Pao របស់ក្រុងហុងកុង អ្នកជំនាញម្នាក់ បាននិយាយថា នាវា Fujian បានទទួលជោគជ័យក្នុងការបាញ់បង្ហោះវត្ថុដែលមានកង់ នៅពេលចូលចតនៅក្រុងស៊ាងហៃ។

ដោយផ្អែកលើការវិភាគរបស់អ្នកជំនាញ សារព័ត៌មាន Global Times ដែលមានទំនាក់ទំនងនឹងបក្សកុម្មុយនីស្ត បានរាយការណ៍កាលពីសប្តាហ៍មុនថា នាវា Fujian អាចដាក់ឲ្យដំណើរការសាកល្បង នៅក្នុងសមុទ្រឆាប់ៗនេះ។ មន្ត្រីសន្តិសុខជប៉ុន ក៏ជឿថា នាវាផ្ទុកយន្តហោះនេះ កំពុងស្ថិតក្រោមការត្រៀមរៀបចំចុងក្រោយ សម្រាប់ការសាកល្បងនាវាចរណ៍។ ដោយត្រូវបានដាក់ឲ្យដំណើរការ កាលពីខែមិថុនា ឆ្នាំ២០២២ នាវា Fujian គឺជានាវាចម្បាំងដ៏ធំបំផុតរបស់ចិន ដោយមានទំហំផ្ទុកជាង ៨០.០០០តោន។

ការបង្កើនវត្តមានយោធារបស់ចិន នៅក្នុងឥណ្ឌូប៉ាស៊ីហ្វិក កំពុងជំរុញឲ្យឥណ្ឌាបង្កើតកងទ័ពជើងទឹកពណ៌ខៀវផងដែរ។ ឥណ្ឌាឥឡូវនេះ ដំណើរការនាវាផ្ទុកយន្តហោះចំនួន២ គឺ INS Vikramaditya ផលិតដោយរុស្ស៊ី និង INS Vikrant ដែលជានាវាផ្ទុកយន្តហោះផលិតក្នុងស្រុកដំបូងរបស់ឥណ្ឌា ដោយមានទំហំផ្ទុកប្រហែល ៤៣.០០០តោន ដែលត្រូវបានដាក់ឲ្យដំណើរការក្នុងឆ្នាំ២០២២។

ប្រទេសចិនបានបង្កើតវត្តមាននៅក្នុងកំពង់ផែតាមបណ្តោយមហាសមុទ្រឥណ្ឌា ក្នុងនោះរួមទាំងនៅក្នុងប្រទេសប៉ាគីស្ថាន និងស្រីលង្កា ក្រោមអ្វីដែលគេហៅថា យុទ្ធសាស្ត្រខ្សែពួរគុជ។ ឥណ្ឌាបានឆ្លើយតបនឹងកជាមួយនឹងពង្រឹងសមត្ថភាពទ័ពជើងទឹករបស់ខ្លួន ដើម្បីឲ្យខ្លួនអាចប្រតិបត្តិការបានសូម្បីតែក្នុងដែនទឹកឆ្ងាយៗ នៅក្បែរម៉ាល់ឌីវ និងសីស្សែល៕