នីការ៉ាហ្គ័រ៖ ការរិះគន់ជាអន្តរជាតិលើរដ្ឋាភិបាលនីការ៉ាហ្គ័របានកើនឡើង បន្ទាប់ពីការចាប់ខ្លួនមនុស្សជាច្រើនក្នុងទីក្រុង Managua។ ប្រទេសចំនួន ៥៩ប្រទេសនៅក្រុមប្រឹក្សាសិទ្ធិមនុស្សអង្គការសហប្រជាជាតិ បានចុះហត្ថលេខាលើសេចក្តីថ្លែងការណ៍មួយ បង្ហាញការព្រួយបារម្ភលើការចាប់ខ្លួនដ៏ឃោរឃៅ និងការរឹតត្បិតសិទ្ធិមនុស្សជាមូលដ្ឋាន។
លោកស្រី Michelle Bachelet ស្នងការជាន់ខ្ពស់ទទួលបន្ទុកសិទ្ធិមនុស្ស អង្គការសហប្រជាជាតិនិយាយថា លោកស្រីបានអំពាវនាវដល់រដ្ឋាភិបាលនីការ៉ាហ្គ័រ ឲ្យមានការផ្លាស់ប្ដូរភ្លាមៗនូវវិធានការដែលកំពុងធ្វើ ក្នុងការប្រឈមទៅនឹងដំណើរការបោះឆ្នោត។ អង្គការឃ្លាំមើលសិទ្ធិមនុស្សបានរាយការណ៍ដោយលំអិត ចំពោះការចាប់ខ្លួនជំរុញដោយផ្នែកនយោបាយនៅប៉ុន្មានសប្តាហ៍ថ្មីៗនេះ នូវបេក្ខជននយោបាយដ៏មានសក្ដានុពល ពាណិជ្ជករឆ្នើម អតីតមន្ត្រីរដ្ឋាភិបាល និងមេដឹកនាំនយោបាយចំនួន ២០រូប។ អង្គការនេះបានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ អនុវត្តន៍មាត្រា ៩៩ នៃធម្មនុញ្ញរបស់ខ្លួនដើម្បីលើកឡើងបញ្ហានេះ នៅក្នុងក្រុមប្រឹក្សាអង្គការសហប្រជាជាតិ និងបង្ហាញពីការកើនឡើងវិបត្តិទាក់ទងទៅនឹងការបំពានសិទ្ធិមនុស្សធ្ងន់ធ្ងរ ដែលអាចធ្វើឲ្យអន្តរាយស្ថិរភាពក្នុងតំបន់។
នាយកអង្គការឃ្លាំមើលសិទ្ធិមនុស្សទ្វីបអាមេរិក លោក José Miguel Vivanco និយាយថា វានឹងជួយគ្រប់គ្រងដើម្បីបញ្ឈប់ការបំពានទាំងនេះ និងផ្លាស់ប្ដូរស្ថានភាពបច្ចុប្បន្ន និងធ្វើឲ្យមានការដោះលែងអ្នកដែលត្រូវបានឃុំខ្លួន។ លោក Daniel Ortega កំពុងស្វែងរកអាណត្តិជាបន្តបន្ទាប់ទី៤ ជាប្រធានាធិបតី និងបានត្រួសត្រាយផ្លូវជាប្រព័ន្ធ នៃការប្រឈមផ្នែកនយោបាយតាមរយៈការចាប់ខ្លួន សម្រាប់បទឧក្រិដ្ឋដែលត្រូវបានចោទប្រកាន់ប្រឆាំងរដ្ឋ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
