យន្តហោះហ្វឹកហ្វឺនយោធា បានធ្លាក់នៅក្នុងក្រុង Dien Ban ខេត្ត Quang Nam ភាគកណ្តាលប្រទេសវៀតណាម នៅម៉ោងប្រមាណ១១ព្រឹក ថ្ងៃអង្គារនេះ។ មុនពេលយន្តហោះធ្លាក់ អាកាសយានិក២នាក់នៅលើ យន្តហោះ បានលោតឆ័ត្រចេញពីយន្តហោះ។

យន្តហោះ បានធ្លាក់នៅទីធ្លាដីវាល ជិតសួនឧទ្យានមួយកន្លែង។ អ្នកធ្វើការនៅក្នុងសួនឧទ្យានម្នាក់ បានរងរបួសស្រាលដោយសារកម្ទេចកម្ទី។

យោងតាមសារព័ត៌មាន VnExpress បានឲ្យដឹងថា នៅទីតាំងធ្លាក់យន្តហោះ ផ្នែកខាងមុខ និងផ្នែកខាងក្រោយយន្តហោះ អាចមើលឃើញចម្ងាយប្រហែល២០០ម៉ែត្រពីគ្នា។

សារព័ត៌មាន បានរាយការណ៍ថា យន្តហោះយោធានេះ ត្រូវបានគ្រប់គ្រងដោយអង្គភាពដែនអាកាស ជាកងពលកងកម្លាំងទ័ពអាកាស លេខ៣៧២។ មេដឹកនាំកងពល បានប្រាប់សារព័ត៌មានថា យន្តហោះបានចេញដំណើរក្នុងទីក្រុង Da Nang ហើយបានជួបឧបទ្ទវហេតុអំឡុងពេលហ្វឹកហ្វឺន។