នាយករដ្ឋមន្ត្រីឥណ្ឌា លោក Narendra Modi បានជួបពិភាក្សាទ្វេភាគីជាមួយប្រធានាធិបតីម៉ូហ្សំប៊ិកលោក Filipe Jacinto Nyusi ប្រធានាធិបតីទីម័រខាងកើត លោក Jose Ramos-Horta និងបានជួបជាមួយបណ្ដានាយកប្រតិបត្តិនៃក្រុមហ៊ុនពិភពលោកជាច្រើន នៅថ្ងៃអង្គារ (ទី៩ ខែមករា) នេះ នៅមុនកិច្ចប្រជុំកំពូល Vibrant Gujarat នៅភាគខាងលិចទីក្រុង Gandhinagar។

ការវិនិយោគលើវិស័យភស្តុភារ ហេដ្ឋារចនាសម្ព័ន្ធ ការអភិវឌ្ឍកំពង់ផែ ការជំរុញដល់ការផលិតបន្ទះអេឡិកត្រូនិក និងការប្រើប្រាស់ថាមពលកកើតឡើងវិញ គឺជាបញ្ហាសំខាន់មួយចំនួន ដែលត្រូវលើកយកមកពិភាក្សា ជាកិច្ចប្រឹងប្រែងដ៏សំខាន់មួយ ដើម្បីជំរុញការវិនិយោគពាណិជ្ជកម្ម នៅក្នុងរដ្ឋ Gujarat ដែលជាស្រុកកំណើតរបស់លោក Modi នៅមុនយុទ្ធនាការបោះឆ្នោតស្វែងរកការជាប់ឆ្នោតឡើងវិញរបស់លោក។

កិច្ចប្រជុំកំពូលពិភពលោក Vibrant Gujarat អំឡុងថ្ងៃទី ១០-១២ ខែមករា ត្រូវបានគេរំពឹងថា នឹងធ្វើឲ្យមានអ្នកចូលរួមប្រហែល ១០០.០០០នាក់ ក្នុងនោះរួមទាំងនាយកប្រតិបត្តិ អ្នកដឹកនាំធុរកិច្ច រដ្ឋមន្ត្រី និងអ្នកការទូតមកពី ១៣៣ប្រទេស ដែលអ្នករៀបចំបានហៅថា ជាការជួបជុំដ៏ធំបំផុតមិនធ្លាប់មាន នៅក្នុងព្រឹត្តិការណ៍ប្រចាំឆ្នាំ ដែលស្ថិតនៅក្នុងការរៀបចំលើកទី១០ របស់ខ្លួន។

បណ្ដាបញ្ជីក្រុមហ៊ុនបរទេសដែលចូលរួម រួមមាន Microsoft, Nasdaq, Alphabet's Google, Suzuki និង Toyota លោក Gautam Adani និងលោក Mukesh Ambani ដែលជាបុគ្គលមានបំផុត ២រូប នៅអាស៊ី ហើយប្រធានក្រុមហ៊ុនពីសាជីវកម្មអំបិលទៅអាកាសចរណ៍ Tata Group នឹងមានវត្តមានក្នុងចំណោមនៃបណ្ដានាយកប្រតិបត្តិជាន់ខ្ពស់ឥណ្ឌា៕