ប្រធានាធិបតីបារាំងលោក Emmanuel Macron ត្រូវបានគេរំពឹងថា នឹងតែងតាំងនាយករដ្ឋមន្ត្រីថ្មី នៅថ្ងៃអង្គារ (ទី៩ ខែមករា) ខណៈដែលរូបលោកប្រឹងប្រែងពង្រឹងអាណត្តិទី២ របស់លោក នៅមុនពេលការបោះឆ្នោតសភាអឺរ៉ុប។

ចំណាត់ការនេះនឹងមិនចាំបាច់នាំឲ្យមានការផ្លាស់ប្តូរនយោបាយដ៏សំខាន់ណាមួយនោះទេ ប៉ុន្តែផ្ទុយទៅវិញជាសញ្ញាបង្ហាញពីគោលបំណងរបស់លោក Macron ដែលព្យាយាមធ្វើដំណើរទៅហួសពីកំណែទម្រង់សោធននិវត្តន៍ និងអន្តោប្រវេសន៍ ដែលមិនទទួលបានការពេញចិត្ត កាលពីឆ្នាំមុន ដោយផ្តោតលើអាទិភាពថ្មី ក្នុងនោះរួមទាំងការសម្រេចបានការងារពេញលេញទាំងស្រុងផងដែរ។

នាយករដ្ឋមន្ត្រីថ្មីក៏នឹងទទួលភារកិច្ច ក្នុងការប្រឹងប្រែងបង្កើនឱកាសរបស់គណបក្សកណ្តាលនិយមរបស់លោក Macron នៅក្នុងការបោះឆ្នោតសហភាពអឺរ៉ុបខែមិថុនា។ ការស្ទង់មតិបង្ហាញពួកគេតាមពីក្រោយមេដឹកនាំស្តាំនិយម លោកស្រី Marine Le Pen ប្រហែលពី ៨ ទៅ ១០ភាគរយ។

លោក Macron ដែលបានប្រឹងប្រែងដោះស្រាយជាមួយនឹងភាពច្របូកច្របល់ក្នុងសភា ចាប់តាំងពីបាត់បង់សំឡេងភាគច្រើនដាច់ខាតរបស់លោកភ្លាមៗ បន្ទាប់ពីការជាប់ឆ្នោតឡើងវិញ ក្នុងឆ្នាំ២០២២ បានប្រកាស កាលពីថ្ងៃចន្ទ (ទី៨ ខែមករា) ថា នាយករដ្ឋមន្ត្រី លោកស្រី Elisabeth Borne កំពុងលាលែងពីតំណែង។

សម្ព័ន្ធមិត្តដ៏ជិតស្និទ្ធរបស់លោក Macron គឺរដ្ឋមន្ត្រីក្រសួងអប់រំ លោក Gabriel Attal ដែលទទួលបានភាពលេចធ្លោ បន្ទាប់ពីត្រូវបានតែងតាំងជាអ្នកនាំពាក្យរដ្ឋាភិបាល អំឡុងពេលជំងឺរាតត្បាតកូវីដ-១៩ ត្រូវបានដកស្រង់សម្តីយ៉ាងទូលំទូលាយ ដោយប្រភពនយោបាយ និងប្រព័ន្ធផ្សព្វផ្សាយបារាំងនានាថា ជាអ្នកមានសិទ្ធិខ្ពស់ជាងគេ ក្នុងការមកជំនួសតំណែងលោកស្រី Borne។ ប្រសិនបើការលើកឡើងនោះត្រូវបានបញ្ជាក់ថា មែននោះ លោក Attal ដែលទើបមានវ័យ ៣៤ឆ្នាំ នឹងក្លាយជានាយករដ្ឋមន្ត្រីវ័យក្មេងបំផុតរបស់ប្រទេសបារាំង និងជាអ្នកស្រលាញ់ភេទដូចគ្នាយ៉ាងបើកចំហដំបូងគេ៕