ភ្នំពេញ៖ រដ្ឋមន្ត្រីក្រសួងបរិស្ថានកម្ពុជា បានស្នើដល់ប្រទេសអង់គ្លេស តាមរយៈរដ្ឋមន្ត្រីការបរទេស និងអភិវឌ្ឍន៍ លោក ដូមីនិករ៉ាអាប់ (Dominic Raab) ទិញឥណទានកាបូនរបស់ប្រទេសកម្ពុជា ដើម្បីជាការរួមចំណែកអភិរក្សព្រៃឈើ និងសត្វព្រៃ និងជាការជួយអភិវឌ្ឍសេដ្ឋកិច្ចមូលដ្ឋានផង។ នេះបើតាមការឱ្យដឹង របស់អ្នកនាំពាក្យក្រសួង។
ឯកឧត្ដម សាយ សំអាល់ រដ្ឋមន្ត្រីក្រសួងបរិស្ថានកម្ពុជា និងរដ្ឋមន្ត្រីការបរទេស និងអភិវឌ្ឍន៍ នៃ ចក្រភពអង់គ្លេសលោក ដូមីនិក រ៉ាអាប់ (Dominic Raab) នៅព្រឹកថ្ងៃទី២៣ ខែមិថុនានេះ ការស្នើនេះ បានជួបជជែកគ្នានៅទីស្តីការក្រសួងបរិស្ថានក្នុងក្របខណ្ឌ នៃដំណើរទស្សនកិច្ចរបស់ប្រមុខការទូតអង់គ្លេសរូបនេះមកកាន់ព្រះរាជាណាចក្រកម្ពុជា រយៈពេល១ថ្ងៃ តបតាមការអញ្ជើញរបស់ប្រមុខការទូតកម្ពុជា។
ឯកឧត្ដម នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឱ្យដឹងថា នៅក្នុងអំឡុងនៃកិច្ចពិភាក្សា បានគូសបញ្ជាក់ពីប្រធានបទមួយចំនួនទាក់ទងនឹងវិស័យបរិស្ថានដូចជា ការប្រយុទ្ធប្រឆាំងនឹងការប្រែប្រួលអាកាសធាតុ និងការចូលរួមរបស់កម្ពុជាក្នុងកិច្ចប្រជុំ COP26 ស្តីពីការប្រែប្រួលអាកាសធាតុ និងកិច្ចការអាទិភាពនានា ដែលប្រទេសទាំងពីរនឹងធ្វើរួមគ្នា។ ការអភិរក្សធនធានធម្មជាតិជីវចម្រុះការប្រយុទ្ធប្រឆាំងនឹងការជួញដូរសត្វព្រៃឆ្លងដែន និងការប្រើប្រាស់ថាមពលកកើតឡើងវិញផងជាដើម។
ឯកឧត្ដម បានបញ្ជាក់ថា ឯកឧត្ដម សាយ សំអាល់ បានជម្រាបជូនលោក ដូមីនិក រ៉ាអាប់ អំពីកិច្ច ការ ដែលក្រសួងបរិស្ថានសម្រេចបាន ក្នុងកិច្ចការពារបរិស្ថាន និងការអភិរក្សធនធានធម្មជាតិ ហើយអ្វី ដែលចក្រភពអង់គ្លេសអាចជួយកម្ពុជាបានក្នុងវិស័យបរិស្ថាន គឺការបណ្តុះបណ្តាលធនធានមនុស្សក្នុងកិច្ចការបរិស្ថាន និងធនធានធម្មជាតិបង្កើនភាពជាដៃគូផ្នែកពាណិជ្ជកម្ម និងទិញផលិតផលពីប្រទេសកម្ពុជា។ «នៅក្នុងវិស័យបរិស្ថានអង់គ្លេស អាចទិញឥណទានកាបូន ហើយថវិកានោះ នឹងត្រូវប្រើប្រាស់ ដើម្បីបម្រើឱ្យការអភិរក្សព្រៃឈើ និងសត្វព្រៃ និងការអភិវឌ្ឍសេដ្ឋកិច្ចមូលដ្ឋាន តាមរយៈការផ្តល់ជម្រើសថ្មីមុខរបរ និងចំណូលសម្រាប់ប្រជាពលរដ្ឋ»។
ដើម្បីជួយក្រសួងបរិស្ថានលើកិច្ចការងារបរិស្ថាន និងធនធានធម្មជាតិ រដ្ឋមន្ត្រីការបរទេស និងអភិវឌ្ឍន៍ នៃចក្រភពអង់គ្លេស បានសន្យាថានឹងបញ្ជូនក្រុមបេសកកម្មជំនាញមកកម្ពុជា ដើម្បីសិក្សាពីតម្រូវការរបស់កម្ពុជា ដើម្បីធ្វើឱ្យកាន់តែប្រសើរឡើងក្នុងវិស័យបរិស្ថាន និងធនធានធម្មជាតិ។
ចាប់ពីឆ្នាំ២០១៦មកដល់បច្ចុប្បន្ននេះ កម្ពុជា បានទទួលថវិកា ប្រមាណ១១,៦លានដុល្លារ ពីការ លក់ឥណទានកាបូនឱ្យទៅក្រុមហ៊ុនអន្តរជាតិធំៗ។ កម្ពុជាកំពុងតែធ្វើការសិក្សា និងអនុវត្តគម្រោងឥណទានកាបូន នៅក្នុងដែនជម្រកសត្វព្រៃព្រៃឡង់ និងតំបន់ការពារធម្មជាតិមួយចំនួនទៀត៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
