អ្នកនាំពាក្យសន្តិសុខជាតិសេតវិមាន លោក John Kirby បាន​ប្រកាស​នៅ​ក្នុង​សន្និសីទ​សារព័ត៌មាន​កាល​ពីថ្ងៃអង្គារ ទី៩ ខែមករា នូវសេចក្តីថ្លែងការណ៍រួមរបស់សហរដ្ឋអាមេរិក និងដៃគូ ដែល​ប្រឆាំងការផ្ទេរអាវុធរវាងប្រទេសកូរ៉េខាងជើង និងរុស្ស៊ី រួមទាំង​ការ​ទិញ​មីស៊ីល​បាលីស្ទីក​របស់​កូរ៉េខាងជើង និងការប្រើប្រាស់មីស៊ីលរបស់ទីក្រុងមូស្គូទៅលើអ៊ុយក្រែនកាលពីថ្ងៃទី ៣០ ខែធ្នូ និងថ្ងៃទី ២ ខែមករា។

សេចក្តីថ្លែងការណ៍នេះ ត្រូវបានចុះហត្ថលេខាដោយសហរដ្ឋអាមេរិក ចក្រភពអង់គ្លេស សហភាព​អឺរ៉ុប អូស្ត្រាលី អាល្លឺម៉ង់ កាណាដា និងប្រទេសជាដៃគូផ្សេងទៀត។ ទាំងទីក្រុងមូស្គូ និង​ក្រុង​ព្យុងយ៉ាង បានខិតកាន់តែជិតគ្នា ចាប់តាំងពីការចាប់ផ្តើមជម្លោះអ៊ុយក្រែន ទោះ​បី​ជា​ពួក​គេ​បាន​បដិសេធ​មិន​បង្កើតកិច្ចព្រមព្រៀងសព្វាវុធណាមួយក៏ដោយ។

មេដឹកនាំប្រទេ​ស​កូរ៉េខាងជើង លោក គីម ជុងអ៊ុន បានជួបជាមួយប្រធានាធិបតី លោក វ្ល៉ាឌីមៀ ពូទីន នៅក្នុងតំបន់​ចុងបូព៌ារបស់រុស្ស៊ី កាលពីខែកញ្ញាឆ្នាំមុន ហើយមន្ត្រីជាន់​ខ្ពស់​រុស្ស៊ី​បាន​ធ្វើ​ទស្សនកិច្ច​ជា​ច្រើន​លើកទៅកាន់ទីក្រុងព្យុងយ៉ាង។

ដោយលើកឡើង​ពីការស៊ើបការណ៍សម្ងាត់បំផុតថ្មី បានឲ្យដឹងថា កាលពីសប្តាហ៍មុន សេតវិមាន​បាន​និយាយថា ប្រទេសរុស្ស៊ី បានប្រើប្រាស់មីស៊ីលបាលីស្ទីករយៈចម្ងាយជិត (SRBM) ដែល​មាន​ប្រភពមកពីប្រទេសកូរ៉េខាងជើង ដើម្បីធ្វើ​ការ​វាយ​ប្រហារ​ជា​ច្រើន​លើក​ទៅ​លើ​ប្រទេ​ស​អ៊ុយក្រែន ។ ក្រោយមក មន្ត្រីជាន់ខ្ពស់អ៊ុយក្រែន បានបញ្ជាក់ពីការអះអាងនេះ៕