មេបញ្ជាការជាន់ខ្ពស់ហេសបូឡា បាននិយាយថា អង្គការភេរវកម្មនេះ មិនចង់ឲ្យ​មាន​សង្រ្គាម​ពង្រីក​ជាមួយអ៊ីស្រាអែលទេ កាលពីថ្ងៃអង្គារ ជាថ្ងៃដែលខ្លួន បានបើកការវាយប្រហារ​ដោយ​យាន​ដ្រូន​ប្រឆាំង​នឹងមូលដ្ឋានកងទ័ពអ៊ីស្រាអែល។

ក្រុមហេសបូឡា ដែលជាក្រុមគាំទ្រដោយអ៊ីរ៉ង់ បានអះអាងថា ការវាយប្រហារកាលពីថ្ងៃអង្គារ គឺ​ជា​ការសងសឹកចំពោះការវាយប្រហាររបស់អ៊ីស្រាអែល ដែលបានសម្លាប់លោក Wissam al-Tawil ដែលបានបញ្ជាឲ្យកងកម្លាំង Radwan របស់ក្រុមហេសបូឡា។

មេដឹក​នាំរងក្រុមហេសបូឡា លោក Naim Qassem បានបញ្ចេញ​សុន្ទរកថា​តាម​ទូរទស្សន៍​ដោយ​បញ្ជាក់​ថា ក្រុមរបស់ខ្លួន មិនស្វែងរកសង្រ្គាមពេញទំហឹងជាមួយអ៊ីស្រាអែលទេ ប៉ុន្តែ​ប្រសិន​បើ​អ៊ីស្រាអែល​ពង្រីកវានោះ ការឆ្លើយតប គឺជៀសមិនរួចក្នុងកម្រិតអតិបរមា ដែលត្រូវការ ដើម្បី​រារាំង​អ៊ីស្រាអែល។

រដ្ឋបាលរបស់ប្រធានាធិបតីលោកបៃដិន បានព្យាយាម​រារាំង​សង្គ្រាម​របស់​អ៊ីស្រាអែល​ប្រឆាំង​នឹង​ក្រុម​ហាម៉ាស មិនឲ្យផ្ទុះឡើងជាជម្លោះក្នុងតំបន់ទេ។ យ៉ាងណាក៏ដោយ ក្រុមភេរវកម្ម​តំណាង​របស់​អ៊ីរ៉ង់ បានធ្វើការវាយប្រហារជាង ១០០លើកលើគោលដៅរបស់អាមេរិក និងអ៊ីស្រាអែល ចាប់​តាំងពីខែតុលាមក។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាន​ប្តេជ្ញា​កាល​ពីថ្ងៃចន្ទថា រដ្ឋាភិបាលរបស់លោកនឹងធ្វើ «អ្វីមួយ» ដើម្បី​នាំ​យក​មក​វិញ​នូវ​សន្តិសុខ​សម្រាប់​អ៊ីស្រាអែល៕