ភ្នំពេញ៖ នៅថ្ងៃនេះ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងតាមប្រព័ន្ធវីដេអូ ក្នុងវេទិកាបណ្តាញបច្ចេកវិទ្យានៃការប្រើប្រាស់ និងការស្តុកទុកកាបូននៅអាស៊ី លើកទី១ (1st Asia CCUS Network Forum) ថា កម្ពុជាបានរួមចំណែកច្រើនរួចទៅហើយ នៃការប្រើប្រាស់ប្រភពថាមពលកកើតឡើងវិញ ដូចជាវារីអគ្គិសនី ប្រភពថាមពលដើរដោយពន្លឺព្រះអាទិត្យ និងជីវម៉ាស់ជាដើម។
វេទិកាដែលរៀបចំដោយក្រសួងសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុន និងវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា ដើម្បីពិភាក្សា អំពីការប្រើប្រាស់ បច្ចេកវិទ្យា ចាប់យកប្រើប្រាស់ និងស្តុកកាបូនទុក ក្នុងតំបន់អាស៊ាននិងអាស៊ីបូព៌ា ជាពិសេសក្នុងអំឡុងពេលដែលតំបន់នេះកំពុងត្រូវការផ្លាស់ប្តូរពីប្រព័ន្ធថាមពលដែលផ្អែកលើឥន្ធនៈហ្វូស៊ីល មកជាប្រព័ន្ធថាមពល ដែលស្អាតជាងមុន។
ឯកឧត្តមបញ្ជាក់ថា ការកាត់បន្ថយឧស្ម័នកាបូននៅក្នុងតំបន់នេះ ពិតជាមានសារៈសំខាន់ណាស់ព្រោះវាជាផ្នែកមួយនៃមាគ៌ាដោយចិរភាព ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ ប៉ុន្តែទោះជាយ៉ាងណាកម្ពុជានៅតែបន្តពឹងផ្អែកប្រើប្រាស់ឥន្ធនៈហ្វូស៊ីលដើម្បីរក្សាសន្តិសុខថាមពលនិងកំណើនសេដ្ឋកិច្ចរបស់ខ្លួនផងដែរ។
ក្នុងន័យនេះ ឯកឧត្តម រដ្ឋមន្ត្រីក៏បានបញ្ជាក់ថា វេទិកាថ្ងៃនេះ ជាឱកាសមាសសម្រាប់ចែករម្លែកចំណេះដឹង និងបទពិសោធន៍ ស្តីពីបច្ចេកវិទ្យានៃការចាប់យកប្រើប្រាស់និងស្តុកកាបូនទុកដែលមានទស្សនៈវិស័យប្រើប្រាស់កាបូន និងស្តុកទុកកាបូននៅក្នុងឧស្ម័នដែលភាយចេញពីការប្រើប្រាស់ឥន្ធនៈហ្វូស៊ីល ជាពិសេសក្នុងវិស័យថាមពល។ឆ្នាំ ២០២០ប្រភពផ្គត់ផ្គង់ថាមពលបឋមរបស់កម្ពុជា មាន៦០%បានមកពីការឥន្ធនៈហ្វូស៊ីល ក្នុងនោះ មានធ្យូងថ្ម និងប្រេង និង៤០%ទៀត បានមកពីប្រភពកកើតឡើងវិញ រួមមានវារីអគ្គិសនី ប្រភពថាមពលដើរដោយពន្លឺព្រះអាទិត្យ និងជីវម៉ាស់។
ដូចនេះ បើយោងតាមស្ថិតិបច្ចុប្បន្ន ប្រទេសកម្ពុជា បានរួមចំណែកយ៉ាងច្រើនរួចទៅហើយក្នុងការបញ្ចូលចំណែក មួយដ៏ធំ នៃប្រភពកកើតឡើងវិញ ទៅក្នុងប្រភពផ្គត់ផ្គង់បឋមនិងទៅក្នុងល្បាយនៃប្រភពថាមពល។
ទោះជាយ៉ាងនេះក្តី ឯកឧត្តម រដ្ឋមន្ត្រីបញ្ជាក់ថាកម្ពុជា នៅតែយល់ឃើញថា ប្រភពថាមពលរបស់កម្ពុជា នៅតែបន្តពឹងផ្អែកលើការប្រើប្រាស់ឥន្ធនៈហ្វូស៊ីលនាពេលអនាគត។ ដូច្នេះវាជាសេចក្តីត្រូវការ ដែលត្រូវតែធានាថា ឥន្ធនៈហ្វូស៊ីល ដូចជាធ្យូងថ្ម ប្រេងនិងឧស្ម័នធម្មជាតិជាដើមត្រូវបានប្រើប្រាស់តាមរបៀបបច្ចេកវិទ្យាមួយដែលស្អាតជាងមុន៕ អត្ថបទ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
