តាមសេចក្តីប្រកាសព័ត៌មានលទ្ធផលកិច្ចប្រជុំលើកទី២២ របស់​គណៈកម្មាធិការ​ជាតិ​សម្រាប់​ការ​អភិវឌ្ឍ​តាម​បែប​ប្រជាធិបតេយ្យនៅថ្នាក់ក្រោមជាតិ គ.ជ.អ.ប នៅថ្ងៃទី៩ ខែមករានេះ បាន​ឲ្យ​ដឹង​ថា នៅក្នុងឆ្នាំ២០២៤ គណៈកម្មាធិការជាតិ បានពិភាក្សា និងអនុម័តផែនការសកម្មភាព និង គ្រោង​ទម្លាក់ថវិកាជាតិជិត ១៨០០លានដុល្លារអាមេរិកទៅ​ឲ្យ​រដ្ឋបាល​ថ្នាក់​ក្រោម​ជាតិ​ ដើម្បី​ពង្រឹង​ប្រសិទ្ធភាព​រដ្ឋបាលការងារ និងការអភិវឌ្ឍមូលដ្ឋាន។

នៅក្នុងកិច្ចប្រជុំគណៈកម្មាធិការជាតិ គ.ជ.អ.ប ក្រោមអធិបតីភាព ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជា ប្រធានគណៈកម្មាធិការជាតិ គ.ជ.អ.ប នោះ បានឲ្យដឹងថា ការអនុវត្ត​កម្ម​វិធី​ជាតិ​សម្រាប់​ការ​អភិវឌ្ឍ​តាម​បែប​ប្រជាធិបតេយ្យ​ដំណាក់​កាលទី​២ ឆ្នាំទី៤ នៅក្នុងឆ្នាំ២០២៤នេះ គឺផ្តោតលើការ​ពង្រឹង​រដ្ឋបាល​ថ្នាក់​ក្រោម​ជាតិឲ្យ​កាន់​តែ​រឹង​ម៉ាំ ស្អាតស្អំ មានសមត្ថភាព លទ្ធភាព និងការ​ទទួល​ខុស​ត្រូវ​ច្បាស់​លាស់​ក្នុង​ការ​អនុវត្ត​មុខងារ​ដែល​រដ្ឋបាល​ថ្នាក់​ជាតិ បានផ្ទេរទៅឲ្យរដ្ឋបាលរដ្ឋបាលថ្នាក់ជាតិអនុវត្ត ជាពិសេស ការធ្វើទំនើប​កម្ម​យន្តការ នីតិវិធីផ្តល់សេវាសាធារណៈជូនពលរដ្ឋ និងការអភិវឌ្ឍមូលដ្ឋាន ប្រកប​ដោយ​តម្លាភាព និងគណនេយ្យភាព។

តាម​ការបញ្ជាក់ពី ឯកឧត្តម ងាន់ ចំរើន ប្រធានលេខាធិការដ្ឋាន គណៈកម្មាធិការជាតិ គ.ជ.អ.ប បាន​ឲ្យដឹងថា នៅក្នុង​ថវិកា​ជាតិ​ដែល​គ្រោង​នឹង​ស្នើ​ទៅ​ប្រមុខ​ថ្នាក់​ដឹកនាំ​រាជ​រដ្ឋាភិបាល​ពិនិត្យ​សម្រេច ថវិកាជាតិប្រមាណជិត ១៨០០ដុល្លារអាមេរិក កើនរហូត២០% នៃថវិកាជាតិសរុប ទម្លាក់​ពីថ្នាក់ជាតិ ទៅឲ្យរដ្ឋបាលថ្នាក់ក្រោមជាតិ គឺមួយចំនួន​នឹង​ធ្វើ​ការ​បែង​ចែង​ទម្លាក់​ឲ្យ​រដ្ឋបាល​ថ្នាក់​ខេត្តរាជធានី ថវិកាប្រមាណជាង ៧០០លានដុល្លារអាមេរិក ទម្លាក់​ឲ្យ​រដ្ឋបាល​ថ្នាក់​ក្រុង​ស្រុក​ខ័ណ្ឌ ប្រមាណជាង ៧៣០លានដុល្លារអាមេរិក និងទម្លាក់​ឲ្យ​រដ្ឋបាល​ថ្នាក់​ឃុំ​សង្កាត់​ទូទាំង​ប្រមាណ​ជាង ៣០០លានដុល្លអាមេរិច ដើម្បីអនុវត្តមុខងារ សកម្មភាពការងារ ដែល​រដ្ឋបាល​ថ្នាក់​ជាតិបានផ្ទេរទៅឲ្យ ជាពិសេសការពង្រឹងប្រសិទ្ធភាពការងារ ផ្តល់សេវា​សាធារណៈ​ជូនពលរដ្ឋ​ឲ្យ​ល្អប្រសើរ ស្អាតស្អំ និងបង្កើនការអភិវឌ្ឍផ្លូវ ថ្នល់ និងសំណង់ដេក និងសំណង់​បញ្ឈរ​ជា​ច្រើនទៀតនៅតាមឃុំសង្កាត់។

ឯកឧត្តម ង៉ាន់ ចំរើន បន្តថា មូលហេតុដែលរាជរដ្ឋាភិបាលបង្កើនថវិកាជាតិរហូត២០%នោះ ផ្ទេរទម្លាក់​ទៅរដ្ឋបាលថ្នាក់ក្រោមជាតិ គឺដោយសារឆ្នាំ២០២៤នេះ ក្រសួងអប់រំយុវជន និងកីឡា សម្រេច​ចិត្តផ្ទេរមុខងារការងារគ្រប់គ្រងសាលាបឋមសិក្សា និងគ្រូបង្រៀនប្រមាណ ៦ម៉ឺននាក់​ឲ្យរដ្ឋបាល​ថ្នាក់ក្រោមជាតិធ្វើការគ្រប់គ្រង៕ អត្ថបទ៖ ស៊ុម សុខជា